తెలంగాణలో పెరిగిన విద్యుత్ బిల్లులు నవంబర్‌లో యూనిట్‌కు 30 పైసలు.. డిసెంబర్ నుంచి 50 పైసలు
రూ.5,420.23 కోట్ల ట్రూ అప్ ఛార్జీల వసూలుకు ప్రభుత్వం అనుమతి
తెలంగాణలో విద్యుత్ వినియోగదారులపై అదనపు భారం పడనుంది. విద్యుత్ సంస్థలకు సంబంధించిన రూ.5,420.23 కోట్ల ట్రూ అప్ ఛార్జీలను వినియోగదారుల నుంచి వసూలు చేసేందుకు ప్రభుత్వం అనుమతి ఇచ్చింది. దీంతో రాష్ట్రంలోని గృహ, ఇతర విద్యుత్ వినియోగదారులపై అదనపు భారం పడనుంది. నవంబర్ నెలలో యూనిట్‌కు 30 పైసలు, డిసెంబర్ నుంచి యూనిట్‌కు 50 పైసల చొప్పున అదనపు ఛార్జీలు వసూలు చేయనున్నారు. ఈ పెంపుతో నవంబర్ నెలలో 100 యూనిట్ల విద్యుత్ వినియోగించే వినియోగదారులు రూ.30 అదనంగా చెల్లించాల్సి ఉంటుంది. డిసెంబర్ నుంచి అదే 100 యూనిట్ల వినియోగానికి రూ.50 అదనపు భారం పడనుంది. తెలంగాణ స్టేట్ సదరన్ పవర్ డిస్ట్రిబ్యూషన్ కంపెనీ (టీజీఎస్‌పీడీసీఎల్) పరిధిలో 29 నెలల పాటు, తెలంగాణ స్టేట్ నార్తర్న్ పవర్ డిస్ట్రిబ్యూషన్ కంపెనీ (టీజీఎన్‌పీడీసీఎల్) పరిధిలో 26 నెలల పాటు ఈ ట్రూ అప్ ఛార్జీలను వసూలు చేసేందుకు అనుమతి లభించింది. విద్యుత్ సరఫరా వ్యయాల్లో వచ్చిన వ్యత్యాసాలను సర్దుబాటు చేసేందుకు ట్రూ అప్ ఛార్జీలను వసూలు చేస్తారు. ఇప్పటికే నిత్యావసర వస్తువుల ధరలు, ఇతర ఖర్చులతో ఇబ్బందులు ఎదుర్కొంటున్న ప్రజలకు విద్యుత్ బిల్లుల రూపంలో అదనపు భారం పడనుంది.
