జవహర్‌నగర్‌ డంపింగ్‌ యార్డు తరలింపే లక్ష్యంగా ఈటల రాజేందర్‌ పాదయాత్ర
- పాదయాత్రలో పాల్గొన్న బీజేపీ నాయకుడు బద్దం ప్రేమ్‌ మహేశ్వర్‌ రెడ్డి
ఎల్బీనగర్‌, అక్టోబర్ 27 | ఎన్ టుడే న్యూస్‌:
జవహర్‌నగర్‌ డంపింగ్‌ యార్డు కారణంగా కాలుష్య సమస్యలను ఎదుర్కొంటున్న ప్రజలకు న్యాయం చేయడం, సమస్యకు శాశ్వత పరిష్కారం సాధించడం లక్ష్యంగా మల్కాజిగిరి ఎంపీ ఈటల రాజేందర్‌ పాదయాత్ర చేపట్టారు. ఈ పాదయాత్రలో గడ్డిఅన్నారం డివిజన్‌ మాజీ కార్పొరేటర్‌, బీజేపీ నాయకుడు బద్దం ప్రేమ్‌ మహేశ్వర్‌ రెడ్డి పాల్గొన్నారు.
జవహర్‌నగర్‌ డంపింగ్‌ యార్డు ప్రభావంతో ఎన్నో ఏళ్లుగా ఇబ్బందులు ఎదుర్కొంటున్న ప్రజల సమస్యలను ప్రభుత్వాల దృష్టికి తీసుకెళ్లి, డంపింగ్‌ యార్డు తరలింపు, కాలుష్య నియంత్రణ, ప్రజల ఆరోగ్య పరిరక్షణకు చర్యలు తీసుకోవాలనే ఉద్దేశంతో పాదయాత్ర నిర్వహిస్తున్నట్లు ఈటల రాజేందర్‌ పేర్కొన్నారు.
డంపింగ్‌ యార్డు సమస్యకు శాశ్వత పరిష్కారం చూపాలని, బాధిత ప్రజలకు న్యాయం జరిగేలా కృషి చేయాలని ఆయన లక్ష్యంగా పెట్టుకున్నట్లు తెలిపారు.
ఈటల రాజేందర్‌ చేపట్టిన పాదయాత్రకు మద్దతుగా పాల్గొన్న బద్దం ప్రేమ్‌ మహేశ్వర్‌ రెడ్డి మాట్లాడుతూ, జవహర్‌నగర్‌ డంపింగ్‌ యార్డు సమస్య పరిష్కారానికి తన వంతు కృషి కొనసాగిస్తానని తెలిపారు. ప్రజల ఆరోగ్యం, పర్యావరణ పరిరక్షణకు ప్రాధాన్యం ఇవ్వాలని ఆయన పేర్కొన్నారు.
