ఆస్తి, నీటి పన్నుల వసూళ్లపై కలెక్టర్ సమీక్ష
సర్కిల్, వార్డు వారీగా లక్ష్యాలు నిర్దేశించి రోజువారీ పురోగతిని సమీక్షించాలని అధికారులకు ఆదేశం
హనుమకొండ | Ntoday News
హనుమకొండ IDOC కార్యాలయంలో గ్రేటర్ వరంగల్ మున్సిపల్ కార్పొరేషన్ (GWMC) ప్రత్యేక అధికారి ఆస్తి, నీటి పన్నుల వసూళ్లపై సమీక్ష సమావేశం నిర్వహించారు. పన్నుల వసూళ్ల పురోగతి, పెండింగ్ బకాయిలు, వసూళ్ల లక్ష్యాలపై అధికారులతో వివరంగా చర్చించారు.
ఈ సందర్భంగా సర్కిల్, వార్డు వారీగా పన్నుల వసూళ్లకు స్పష్టమైన లక్ష్యాలను నిర్దేశించి, వాటి సాధనపై రోజువారీగా పురోగతిని సమీక్షించాలని అధికారులను ఆదేశించారు. నిర్ణయించిన లక్ష్యాలను వేగంగా పూర్తి చేసేలా క్షేత్రస్థాయిలో ప్రత్యేక చర్యలు చేపట్టాలని సూచించారు.
ముఖ్యంగా కొత్త అసెస్మెంట్లు, డబుల్ అసెస్మెంట్లు, టాప్ డిఫాల్టర్లు, కమర్షియల్ భవనాలు, దీర్ఘకాలంగా పెండింగ్లో ఉన్న పన్ను బకాయిలపై ప్రత్యేక దృష్టి సారించాలని తెలిపారు. బకాయిల వసూళ్లను వేగవంతం చేసి మున్సిపల్ ఆదాయాన్ని పెంచేలా అధికారులు సమన్వయంతో పనిచేయాలని సూచించారు.
పన్నుల వసూళ్లలో నిర్లక్ష్యం లేకుండా నిర్దేశించిన లక్ష్యాలను ఎప్పటికప్పుడు పరిశీలిస్తూ, అవసరమైన చర్యలు తీసుకోవాలని అధికారులకు ఆదేశించారు.
