ఢిల్లీలో ఉద్రిక్తంగా మారిన ఇండీ కూటమి ర్యాలీ

న్యూఢిల్లీ: కేంద్ర ఎన్నికల సంఘం (ECI), ప్రధాన ఎన్నికల కమిషనర్‌ జ్ఞానేశ్‌ కుమార్‌కు వ్యతిరేకంగా ఇండీ కూటమి నేతలు మంగళవారం ఢిల్లీలో చేపట్టిన నిరసన ర్యాలీ ఉద్రిక్తంగా మారింది. పార్లమెంట్‌ నుంచి ఎన్నికల సంఘం కార్యాలయం వైపు వెళ్తున్న నేతలను పోలీసులు బారికేడ్ల వద్ద అడ్డుకున్నారు. దీంతో పలువురు ప్రతిపక్ష ఎంపీలు రోడ్డుపై బైఠాయించి నిరసన తెలిపారు.

ఈ క్రమంలో కాంగ్రెస్‌ నేత, లోక్‌సభ ప్రతిపక్ష నాయకుడు రాహుల్‌ గాంధీ పోలీసుల బారికేడ్లు ఎక్కారు. చేతిలో జాతీయ పతాకాన్ని పట్టుకుని ఆయన నిరసనలో పాల్గొన్నారు. తృణమూల్‌ కాంగ్రెస్‌ నేత అభిషేక్‌ బెనర్జీ కూడా బారికేడ్‌ ఎక్కినట్లు వార్తలు వెలువడ్డాయి.

పోలీసులు ర్యాలీని ముందుకు వెళ్లకుండా అడ్డుకోవడంతో పలువురు నేతలు అక్కడే ధర్నాకు దిగారు. అనంతరం రాహుల్‌ గాంధీ, ప్రియాంక గాంధీ వాద్రా సహా పలువురు ఇండీ కూటమి నేతలను పోలీసులు అదుపులోకి తీసుకున్నారు. వారిని పోలీసు వాహనాల్లో తరలించారు.

ప్రత్యేక ఓటరు జాబితా సవరణ (SIR) ప్రక్రియపై అభ్యంతరాలు వ్యక్తం చేస్తూ, ప్రధాన ఎన్నికల కమిషనర్‌ జ్ఞానేశ్‌ కుమార్‌ రాజీనామా చేయాలని ఇండీ కూటమి నేతలు డిమాండ్‌ చేస్తున్నారు. ఎన్నికల సంఘం మాత్రం SIRకు సంబంధించిన నిర్ణయాలు నిబంధనల ప్రకారమే, ఏకగ్రీవంగా తీసుకున్నామని స్పష్టం చేసింది.