డిజిటల్ లైఫ్ సర్టిఫికేట్ క్యాంపెయిన్ 5.0 ప్రారంభం

తొలి ఐదు రోజుల్లోనే 60 శాతం పెరిగిన సర్టిఫికేట్ల జారీ.. ఫేస్ ఆథెంటికేషన్ ద్వారా 40 లక్షల మందికి సేవలు

(ఎన్ టుడే న్యూస్):

దేశవ్యాప్తంగా పెన్షనర్లకు డిజిటల్ లైఫ్ సర్టిఫికేట్లను అందించేందుకు చేపట్టిన డిజిటల్ లైఫ్ సర్టిఫికేట్ క్యాంపెయిన్ 5.0 ప్రారంభమైంది. ఈ ప్రచారంలో భాగంగా తొలి ఐదు రోజుల్లోనే డిజిటల్ లైఫ్ సర్టిఫికేట్ల జారీ గతంతో పోలిస్తే 60 శాతం పెరిగినట్లు వెల్లడైంది. ముఖ్యంగా ఫేస్ ఆథెంటికేషన్ విధానం ద్వారా పెన్షనర్లు సులభంగా తమ జీవిత ధ్రువీకరణ పత్రాలను పొందుతున్నారు.

ఈ ప్రచారంలో ఇప్పటివరకు సుమారు 80 శాతం మంది పెన్షనర్లు ఫేస్ ఆథెంటికేషన్‌ను వినియోగించి దాదాపు 40 లక్షల డిజిటల్ లైఫ్ సర్టిఫికేట్లను పొందినట్లు సమాచారం. స్మార్ట్‌ఫోన్‌లో అందుబాటులో ఉన్న ఫేస్ ఆథెంటికేషన్ సాంకేతికత ద్వారా పెన్షనర్లు బయోమెట్రిక్ పరికరాలపై ఆధారపడకుండా తమ ముఖాన్ని ధ్రువీకరించడం ద్వారా సర్టిఫికేట్ సమర్పించే అవకాశం కలుగుతోంది.

దేశవ్యాప్తంగా సుమారు 3,000 ప్రాంతాల్లో ఈ ప్రచారాన్ని నిర్వహించేందుకు ఏర్పాట్లు చేశారు. పెన్షనర్లు, ముఖ్యంగా వృద్ధులు కార్యాలయాలకు వెళ్లి ఇబ్బందులు పడకుండా ఉండేందుకు డోర్‌స్టెప్ సేవలను కూడా అందుబాటులోకి తీసుకొచ్చారు. ఈ సేవల ద్వారా వృద్ధులు తమ నివాసాల వద్దే డిజిటల్ లైఫ్ సర్టిఫికేట్ సమర్పించే వెసులుబాటు పొందనున్నారు.

డిజిటల్ విధానంలో లైఫ్ సర్టిఫికేట్ సమర్పణ ప్రక్రియను మరింత సులభతరం చేయడం, పెన్షనర్ల సమయం, ప్రయాణ ఇబ్బందులను తగ్గించడం ఈ ప్రచారం ప్రధాన లక్ష్యంగా ఉంది.