ఇన్వెస్ట్ తెలంగాణ గ్లోబల్ సమ్మిట్‌కు మహారాష్ట్ర సీఎం ఫడ్నవీస్‌కు ఆహ్వానం
- డిసెంబర్ 7, 8, 9 తేదీల్లో భారత్ ఫ్యూచర్ సిటీలో ప్రతిష్టాత్మక సదస్సు
హైదరాబాద్: తెలంగాణ రాష్ట్రంలో పెట్టుబడులను ఆకర్షించడం, పారిశ్రామిక అభివృద్ధికి కొత్త అవకాశాలను సృష్టించడమే లక్ష్యంగా హైదరాబాద్‌లోని భారత్ ఫ్యూచర్ సిటీలో డిసెంబర్ 7, 8, 9 తేదీల్లో అత్యంత ప్రతిష్టాత్మకంగా నిర్వహించనున్న ‘ఇన్వెస్ట్ తెలంగాణ గ్లోబల్ సమ్మిట్’కు హాజరు కావాల్సిందిగా ముఖ్యమంత్రి ఎ. రేవంత్ రెడ్డి మహారాష్ట్ర ముఖ్యమంత్రి దేవేంద్ర ఫడ్నవీస్‌ను ఆహ్వానించారు. తుమ్మిడిహెట్టి బ్యారేజీకి సంబంధించిన అంశంపై జరిగిన సమావేశం అనంతరం రేవంత్ రెడ్డి, తెలంగాణలో నిర్వహించనున్న గ్లోబల్ సమ్మిట్ వివరాలను ఫడ్నవీస్‌కు వివరించారు. అంతర్జాతీయ స్థాయిలో పెట్టుబడులను ఆకర్షించే లక్ష్యంతో నిర్వహిస్తున్న ఈ ప్రతిష్టాత్మక సదస్సులో పాల్గొనాలని కోరారు. దీనిపై మహారాష్ట్ర ముఖ్యమంత్రి దేవేంద్ర ఫడ్నవీస్ సానుకూలంగా స్పందించారు. సదస్సులో పాల్గొనేందుకు తనకు ఆసక్తి ఉందని, హాజరయ్యేందుకు ప్రయత్నిస్తానని తెలిపారు. ఈ సదస్సు ద్వారా తెలంగాణలో పెట్టుబడులకు మరింత ఊతం లభించడంతో పాటు పారిశ్రామిక రంగంలో కొత్త భాగస్వామ్యాలకు అవకాశాలు ఏర్పడనున్నాయి.
