45 పైసలకే రూ.10 లక్షల బీమా..
- రేపటి నుంచే కొత్త విధానం ఆఫ్‌లైన్ టికెట్లు కొనేవారికీ ప్రయాణ బీమా.. డిజిటల్ చెల్లింపుల ద్వారానే అవకాశం
రైల్వే ప్రయాణికులకు కేంద్ర ప్రభుత్వం కీలక సదుపాయాన్ని అందుబాటులోకి తీసుకురానుంది. రైల్వే బోర్డు నిర్ణయం ప్రకారం అక్టోబర్ 27 నుంచి రైల్వే టికెట్ కౌంటర్లలో ఆఫ్‌లైన్‌లో టికెట్లు కొనుగోలు చేసే ప్రయాణికులకు కూడా రూ.10 లక్షల వరకు ప్రయాణ బీమా పొందే అవకాశం కల్పించనున్నారు. సుప్రీంకోర్టు ఆదేశాల నేపథ్యంలో ఈ నిర్ణయం తీసుకున్నట్లు సమాచారం. ఈ బీమా సదుపాయం తప్పనిసరి కాదు. ప్రయాణ బీమా కావాలనుకునే ప్రయాణికులు టికెట్ కొనుగోలు సమయంలో అదనంగా 45 పైసలు చెల్లించాల్సి ఉంటుంది. కేవలం 45 పైసలకే రూ.10 లక్షల వరకు బీమా రక్షణ పొందే అవకాశం ఉండటంతో ప్రయాణికులకు ఇది ప్రయోజనకరంగా మారనుంది. అయితే, బీమా ప్రీమియం మొత్తాన్ని నగదు రూపంలో స్వీకరించేందుకు అవకాశం ఉండదు. ప్రయాణికులు డిజిటల్ చెల్లింపుల ద్వారానే 45 పైసలు చెల్లించాల్సి ఉంటుంది. ఇందుకు అనుగుణంగా టికెట్ కౌంటర్లలో డిజిటల్ చెల్లింపులను స్వీకరించాలని రైల్వే బోర్డు ఆదేశాలు జారీ చేసినట్లు సమాచారం. ఇప్పటివరకు ఆన్‌లైన్‌లో టికెట్లు బుక్ చేసుకునే వారికి అందుబాటులో ఉన్న ఈ సదుపాయాన్ని ఆఫ్‌లైన్ ప్రయాణికులకు కూడా విస్తరించడం ద్వారా మరింత మందికి ప్రయోజనం కలగనుంది.
