వర్షాన్ని లెక్కచేయకుండా వైసీపీ అభ్యర్థి తరఫున ఎంపీ మిథున్ రెడ్డి ప్రచారం

చౌడేపల్లిలో జడ్పీటీసీ అభ్యర్థి శ్రీ విద్యకు మద్దతుగా పర్యటన.. అఖండ మెజారిటీతో గెలిపించాలని ఓటర్లకు విజ్ఞప్తి

చౌడేపల్లి, నవంబర్ 3 (ఎన్ టుడే న్యూస్):

అన్నమయ్య జిల్లా పుంగనూరు నియోజకవర్గంలోని చౌడేపల్లి మండలంలో వైసీపీ జడ్పీటీసీ అభ్యర్థి శ్రీ విద్య తరఫున రాజంపేట ఎంపీ పెద్దిరెడ్డి వెంకట మిథున్ రెడ్డి ఎన్నికల ప్రచారం నిర్వహించారు. జడివానను సైతం లెక్కచేయకుండా పట్టణంతో పాటు మండల పరిధిలో ప్రచార కార్యక్రమాన్ని కొనసాగించారు.

ఘన స్వాగతం పలికిన వైసీపీ శ్రేణులు

చౌడేపల్లికి చేరుకున్న ఎంపీ మిథున్ రెడ్డికి వైసీపీ నాయకులు, కార్యకర్తలు ఘన స్వాగతం పలికారు. గజమాలతో సత్కరించారు. ఆయన రాకతో పార్టీ శ్రేణుల్లో ఉత్సాహం నెలకొంది.

అఖండ మెజారిటీతో గెలిపించాలని విజ్ఞప్తి

ఈ సందర్భంగా మిథున్ రెడ్డి మాట్లాడుతూ.. పుంగనూరు నియోజకవర్గంలోని చౌడేపల్లి మండలంలో జరుగుతున్న స్థానిక ఎన్నికల్లో వైసీపీ తరఫున పోటీ చేస్తున్న జడ్పీటీసీ అభ్యర్థి శ్రీ విద్య విజయానికి పార్టీ నాయకులు, కార్యకర్తలు కృషి చేయాలని కోరారు. మండలంలోని ప్రతి గ్రామంలో పర్యటించి ప్రజలను కలిసి అభ్యర్థికి మద్దతు తెలపాలని, అఖండ మెజారిటీతో గెలిపించాలని విజ్ఞప్తి చేశారు.

పాల్గొన్న నాయకులు, కార్యకర్తలు

ఈ ప్రచార కార్యక్రమంలో జడ్పీటీసీ అభ్యర్థి శ్రీ విద్య, మాజీ ఎంపీపీ రుక్మిణమ్మతో పాటు మహిళలు, గ్రామస్తులు, వైఎస్ఆర్సీపీ నాయకులు, కార్యకర్తలు పెద్ద సంఖ్యలో పాల్గొన్నారు.