సింగపూర్ సహకారంతో విద్యా, పరిపాలనా రంగాల్లో అంతర్జాతీయ స్థాయి శిక్షణకు ప్రణాళిక

అమరావతి:

రాష్ట్రంలోని విద్యా, పరిపాలనా రంగాల్లో అంతర్జాతీయ ప్రమాణాలతో కూడిన శిక్షణ కార్యక్రమాలను విస్తరించేందుకు మంత్రి నారా లోకేష్ దృష్టి సారించారు. సింగపూర్ ప్రభుత్వ సహకారంతో ఉపాధ్యాయులకు ఆధునిక బోధనా పద్ధతులపై శిక్షణ అందించడంతో పాటు, ప్రభుత్వ అధికారుల్లో పరిపాలనా నైపుణ్యాలను పెంపొందించే దిశగా చర్యలు చేపట్టాలని సూచించారు.

ఈ సందర్భంగా ఉత్తమ ఉపాధ్యాయులను ఎంపిక చేసి సింగపూర్‌లో ప్రత్యేక శిక్షణకు పంపించాలని నారా లోకేష్ ప్రతిపాదించారు. అక్కడ శిక్షణ పొందిన ఉపాధ్యాయుల ద్వారా రాష్ట్రంలోని ఇతర ఉపాధ్యాయులకు ఆధునిక బోధనా విధానాలు, నూతన విద్యా పద్ధతులు, బోధనలో సాంకేతిక పరిజ్ఞానం వినియోగంపై అవగాహన కల్పించాలని సూచించారు. తద్వారా విద్యా రంగంలో అంతర్జాతీయ స్థాయి అనుభవాలను రాష్ట్రంలోని పాఠశాలలకు విస్తరించేలా కార్యాచరణ రూపొందించాలని పేర్కొన్నారు.

అలాగే డిజిటల్ గవర్నెన్స్, నాయకత్వ నైపుణ్యాలు, స్కిల్ డెవలప్‌మెంట్ వంటి కీలక రంగాల్లో సింగపూర్ అనుభవాన్ని వినియోగించుకోవాలని సూచించారు. ప్రభుత్వ పాలనలో సాంకేతిక పరిజ్ఞానాన్ని మరింత సమర్థవంతంగా ఉపయోగించుకోవడంతో పాటు, అధికారులకు అవసరమైన నైపుణ్య శిక్షణ అందించే అంశాలపై దృష్టి సారించాలని తెలిపారు.

అమరావతిలో నిర్వహించిన మూడో జాయింట్ ఇంప్లిమెంటేషన్ స్టాండింగ్ కమిటీ సమావేశంలో ఈ అంశాలతో పాటు భవిష్యత్తులో చేపట్టాల్సిన కార్యాచరణపై చర్చించారు. గత సమావేశాల్లో తీసుకున్న నిర్ణయాల అమలు పురోగతిని సమీక్షించి, వాటిని నిర్ణీత కాలవ్యవధిలో పూర్తి చేసేలా చర్యలు తీసుకోవాలని సూచించారు.

సింగపూర్ సహకారంతో చేపట్టే కార్యక్రమాల అమలు తీరును పర్యవేక్షించేందుకు ప్రతి ఆరు నెలలకోసారి సమీక్షా సమావేశాలు నిర్వహించాలని అధికారులను ఆదేశించారు. విద్య, పరిపాలన, నైపుణ్యాభివృద్ధి రంగాల్లో పరస్పర సహకారాన్ని మరింత విస్తరించేలా కార్యాచరణ రూపొందించాలని సూచించారు.