మరోసారి పెరగనున్న టెలికాం రీఛార్జ్ ధరలు

దేశీయ టెలికాం రంగంలో మొబైల్ రీఛార్జ్ ధరలు మరోసారి పెరిగే అవకాశం ఉంది. రాబోయే 4–5 నెలల్లో జియో, ఎయిర్‌టెల్, వొడాఫోన్ ఐడియా వంటి ప్రధాన టెలికాం సంస్థలు తమ రీఛార్జ్ ప్లాన్ల ధరలను పెంచే అవకాశం ఉందని మార్కెట్ వర్గాల్లో అంచనాలు వ్యక్తమవుతున్నాయి.

5జీ నెట్‌వర్క్ విస్తరణ, నిర్వహణ వ్యయాలు పెరగడం, వినియోగదారుడి నుంచి వచ్చే సగటు ఆదాయం (ARPU)ను పెంచుకోవాల్సిన అవసరం వంటి అంశాలు టారిఫ్ పెంపునకు కారణాలుగా చెబుతున్నారు. ఈ నేపథ్యంలో రీఛార్జ్ ధరలు సుమారు 12 నుంచి 15 శాతం వరకు పెరిగే అవకాశం ఉందని తెలుస్తోంది.

టారిఫ్ పెంపు అమల్లోకి వస్తే మొబైల్ వినియోగదారుల నెలవారీ రీఛార్జ్ ఖర్చులు పెరగనున్నాయి. ముఖ్యంగా ఎక్కువ డేటా, దీర్ఘకాలిక వ్యాలిడిటీ ప్లాన్లను వినియోగించే వారిపై అదనపు భారం పడే అవకాశం ఉంది. అయితే కంపెనీలు అధికారికంగా కొత్త ధరలను ప్రకటించే వరకు పెంపు శాతం, అమలు తేదీపై స్పష్టత ఉండదు.