కంటి ఆరోగ్యానికి 20-20-20 రూల్‌

ఆరోగ్యం : స్మార్ట్‌ఫోన్లు, కంప్యూటర్లు, ట్యాబ్లెట్లు వంటి డిజిటల్‌ స్క్రీన్లను ఎక్కువసేపు చూడటం వల్ల కళ్లపై ఒత్తిడి పెరిగే అవకాశం ఉంది. గంటల తరబడి స్క్రీన్‌ వైపు చూడటం వల్ల కనురెప్పలు తక్కువగా ఆర్పడం, కళ్లలో పొడిబారడం, మంట, అలసట వంటి సమస్యలు ఎదురయ్యే అవకాశం ఉందని నిపుణులు సూచిస్తున్నారు.

స్క్రీన్‌ వినియోగం సమయంలో కళ్లకు విశ్రాంతి కల్పించేందుకు ‘20-20-20 రూల్‌’ను పాటించాలని సూచిస్తున్నారు. ఈ నియమం ప్రకారం ప్రతి 20 నిమిషాలకు ఒకసారి కనీసం 20 సెకన్ల పాటు స్క్రీన్‌ నుంచి దృష్టిని మళ్లించి, సుమారు 20 అడుగుల దూరంలో ఉన్న వస్తువును చూడాలి.

ఇలా క్రమం తప్పకుండా విరామాలు తీసుకోవడం వల్ల ఎక్కువసేపు స్క్రీన్‌ చూడటం కారణంగా కళ్లపై పడే ఒత్తిడి, అలసటను తగ్గించుకోవడానికి సహాయపడుతుంది. ముఖ్యంగా కంప్యూటర్‌ లేదా మొబైల్‌ను ఎక్కువసేపు ఉపయోగించే వారు ఈ అలవాటును పాటించడం ద్వారా కంటి సౌకర్యాన్ని మెరుగుపరుచుకోవచ్చని నిపుణులు చెబుతున్నారు.

అయితే కళ్లలో నిరంతరం నొప్పి, మంట, చూపు మసకబారడం లేదా ఇతర సమస్యలు కొనసాగితే స్వయంగా చికిత్స చేసుకోకుండా కంటి వైద్య నిపుణులను సంప్రదించడం మంచిది.