తమ దేశంలోని విదేశీయుల పౌరసత్వాల రద్దును అమెరికా ప్రారంభించింది.
వాషింగ్టన్: అమెరికా ప్రభుత్వం 40 మంది సహజీకృత పౌరులపై పౌరసత్వ రద్దు (డీనాచురలైజేషన్‌) చర్యలను ప్రారంభించింది. విదేశీ ప్రభుత్వ ఏజెంట్‌గా వ్యవహరించడం, హత్యకు సంబంధించిన నేరాలు, ఇతర తీవ్రమైన ఆరోపణలు సహా వివిధ కేసులను ఎదుర్కొంటున్న వీరిపై అమెరికాలోని పలు ఫెడరల్‌ కోర్టుల్లో చర్యలు కొనసాగుతున్నట్లు న్యాయశాఖ వెల్లడించింది.
ఈ జాబితాలో భారతీయుడు బల్విందర్ సింగ్ కూడా ఉన్నారు. కాలిఫోర్నియాకు చెందిన ఆయన నకిలీ గుర్తింపును ఉపయోగించి అమెరికాలో ప్రవేశించి, అనంతరం పౌరసత్వం పొందినట్లు న్యాయశాఖ ఆరోపించింది. 1992లో ఒక గుర్తింపుతో ఇమ్మిగ్రేషన్‌ దరఖాస్తు చేసుకున్న ఆయన, 2003లో మరో గుర్తింపుతో శాశ్వత నివాస హోదా పొందినట్లు అధికారులు పేర్కొన్నారు. 2009లో రెండో గుర్తింపుతో అమెరికా పౌరసత్వం పొందినట్లు వివరించారు.
అమెరికా న్యాయశాఖ ప్రకారం, బల్విందర్ సింగ్‌పై పలు తప్పుడు వివరాలు సమర్పించడం, చట్టవిరుద్ధ చర్యలకు సంబంధించిన ఆరోపణలు ఉన్నాయి. ఈ ఆరోపణల ఆధారంగా ఆయనకు మంజూరైన పౌరసత్వాన్ని రద్దు చేయాలని కోర్టును కోరుతూ చర్యలు ప్రారంభించారు.
ఈ సందర్భంగా అమెరికా అటార్నీ జనరల్ టాడ్ బ్లాంచే మాట్లాడుతూ, 40 మందిపై ఒకేసారి చేపట్టిన ఈ చర్యలు ఆధునిక చరిత్రలోనే అతిపెద్ద డీనాచురలైజేషన్‌ చర్యగా పేర్కొన్నారు. అయితే, పౌరసత్వ రద్దు అనేది కోర్టు ప్రక్రియ ద్వారా నిర్ణయించాల్సిన అంశం కావడంతో, ఆరోపణలు ఎదుర్కొంటున్న వారిపై తుది నిర్ణయం న్యాయస్థానాల పరిధిలో ఉంటుంది.
