పర్వతాపురంలో విద్యుత్ షాక్కు రెండు గేదెలు బలి
అప్పు చేసి కొనుగోలు చేసిన గేదెలు మృతి.. కన్నీరుమున్నీరైన కుటుంబ సభ్యులు
ఏలూరు జిల్లా నూజివీడు నియోజకవర్గం చాట్రాయి మండలం పర్వతాపురం గ్రామంలో విద్యుత్ షాక్కు గురై రెండు గేదెలు మృతి చెందిన ఘటన విషాదం నింపింది. గ్రామానికి చెందిన కల్లేపల్లి వెంకటేశ్వరరావు (పుల్లయ్య)కు చెందిన తోటలో పుల్లయ్య కాపలాదారుడిగా ఉంటూ జీవనం సాగిస్తున్నాడు. జీవనోపాధి కోసం అప్పు చేసి రెండు గేదెలను కొనుగోలు చేసి, వాటిని తోటలో మేపుకుంటూ కుటుంబాన్ని పోషించుకుంటున్నాడు.
అయితే అనూహ్యంగా విద్యుత్ షాక్కు గురై రెండు గేదెలు మృతి చెందాయి. దీంతో పుల్లయ్యతో పాటు కుటుంబ సభ్యులు గేదెల మృతదేహాల వద్ద కన్నీరుమున్నీరుగా విలపించారు. అప్పు చేసి కొనుగోలు చేసిన గేదెలు మృతి చెందడంతో కుటుంబానికి తీవ్ర ఆర్థిక నష్టం వాటిల్లిందని స్థానికులు తెలిపారు.
పుల్లయ్య కుటుంబ పరిస్థితిని దృష్టిలో ఉంచుకుని విద్యుత్ శాఖ అధికారులు ఘటనపై పూర్తిస్థాయిలో విచారణ జరిపి, నష్టానికి తగిన పరిహారం అందేలా చర్యలు తీసుకోవాలని పర్వతాపురం గ్రామస్థులు కోరుతున్నారు. ప్రమాదానికి దారితీసిన విద్యుత్ లోపాన్ని గుర్తించి భవిష్యత్తులో ఇలాంటి ఘటనలు పునరావృతం కాకుండా చర్యలు తీసుకోవాలని వారు విజ్ఞప్తి చేశారు.
