ఎన్నికల్లో అక్రమాలు జరిగాయని వైఎస్సార్‌సీపీ జెడ్పీటీసీ అభ్యర్థి ఆరోపణలు

ప్రజల మద్దతుతో నైతికంగా విజయం సాధించాం: దుగ్గిరెడ్డి ప్రతాప్ రెడ్డి

సీఎస్ పురం (ఎన్ టుడే న్యూస్): ఇటీవల జరిగిన జెడ్పీటీసీ ఎన్నికల్లో తెలుగుదేశం పార్టీ నాయకులు, కార్యకర్తలు అక్రమాలకు పాల్పడి విజయం సాధించారని సీఎస్ పురం వైఎస్సార్‌సీపీ జెడ్పీటీసీ అభ్యర్థి దుగ్గిరెడ్డి ప్రతాప్ రెడ్డి ఆరోపించారు. ఎన్నికల సందర్భంగా తమ ఏజెంట్లపై దాడులు చేసి, ఓటర్లను భయభ్రాంతులకు గురిచేసి రిగ్గింగ్‌కు పాల్పడ్డారని ఆయన ఒక ప్రకటనలో పేర్కొన్నారు.

ప్రతి పోలింగ్ కేంద్రంలోనూ టీడీపీకి చెందిన వ్యక్తులు చొరబడి తమ ఏజెంట్లపై దాడులు చేశారని, ఓటర్లను భయపెట్టి ఎన్నికల ప్రక్రియను ప్రభావితం చేశారని ఆరోపించారు. అధికార పార్టీకి పోలీసులు, అధికారులు సహకరించారని, అక్రమ అరెస్టులకు పాల్పడ్డారని విమర్శించారు. పోలింగ్ కేంద్రాల్లో రిగ్గింగ్‌కు సహకరించారన్న ఆరోపణలపై సంబంధిత అధికారులు సమాధానం చెప్పాలని పేర్కొన్నారు.

ప్రజల ప్రేమ, ఆదరణ తమకు నైతిక విజయాన్ని అందించాయని ప్రతాప్ రెడ్డి అన్నారు. సరైన సమయంలో మరింత బలంగా తిరిగి వస్తామని తెలిపారు. ఎన్నికల్లో కష్టపడి పనిచేసిన పార్టీ నాయకులు, కార్యకర్తలకు కృతజ్ఞతలు తెలిపారు. భవిష్యత్తులోనూ పార్టీ కోసం ఇదే విధంగా పనిచేయాలని కోరారు.