ఉద్యోగ ఆఫర్లు అమలు చేయని 22 కంపెనీలపై చర్యలు..
ప్లేస్మెంట్ సహకారం నిలిపివేత
న్యూఢిల్లీ: విద్యార్థులకు ప్రకటించిన ఉద్యోగ ఆఫర్లను అమలు చేయలేదన్న కారణంతో ఒరాకిల్ సహా 22 కంపెనీలతో వచ్చే రెండు ప్లేస్మెంట్ సీజన్లలో క్యాంపస్ నియామకాల విషయంలో సహకరించకూడదని 23 ఐఐటీలకు చెందిన ఆల్ ఐఐటీస్ ప్లేస్మెంట్ కమిటీ (AIPC) నిర్ణయించినట్లు పలు నివేదికలు వెల్లడించాయి.
ఈ కంపెనీలు 150కి పైగా ఉద్యోగ ఆఫర్లను అమలు చేయలేదని ఐఐటీలు గుర్తించినట్లు సమాచారం. దీంతో సంబంధిత సంస్థలతో తదుపరి రెండు ప్లేస్మెంట్ సీజన్లలో సహకారాన్ని నిలిపివేయాలని నిర్ణయించినట్లు తెలుస్తోంది.
ఈ జాబితాలో ఒరాకిల్ కూడా ఉన్నట్లు పలు నివేదికలు పేర్కొంటున్నాయి. అయితే ఈ నిర్ణయం ఒక్క ఐఐటీ ఢిల్లీకి సంబంధించినది కాదని, 23 ఐఐటీలకు చెందిన ప్లేస్మెంట్ కమిటీల సమిష్టి నిర్ణయంగా నివేదికలు వెల్లడిస్తున్నాయి.
ఐఐటీలు ఈ చర్యను 'బ్లాక్లిస్ట్'గా కాకుండా 'నాన్-కోఆపరేషన్'గా పేర్కొంటున్నాయి. ఉద్యోగ ఆఫర్లు అమలు కాకపోవడంతో ప్రభావితమైన విద్యార్థులకు ఇతర కంపెనీల్లో అవకాశాలు కల్పించేందుకు ఆయా ఐఐటీల ప్లేస్మెంట్ విభాగాలు చర్యలు తీసుకుంటున్నట్లు సమాచారం.
అయితే 22 కంపెనీల పూర్తి జాబితా, ప్రతి సంస్థకు సంబంధించిన ఆఫర్ల సంఖ్య, నిర్ణయానికి సంబంధించిన అధికారిక వివరాలపై ఆయా ఐఐటీలు లేదా AIPC నుంచి మరింత స్పష్టత రావాల్సి ఉంది.
