అఖిలభారత కిసాన్ మహాసభలను జయప్రదం చేయండి

అఖిలభారత కిసాన్ మహాసభలను జయప్రదం చేయండి ఎంఎల్ లిబరేషన్ మండల కార్యదర్శి వేముల బక్కయ్య ముసునూరు, సెప్టెంబర్ 15: అఖిలభారత కిసాన్ మహాసభలను జయప్రదం చేయాలని సిపిఐ ఎంఎల్ లిబరేషన్ మండల కార్యదర్శి వేముల బక్కయ్య పిలుపునిచ్చారు. అఖిలభారత కిసాన్ మహాసభ మండల కమిటీ సమావేశం అధ్యక్షుడు మేడూరి సర్వీసు అధ్యక్షతన మంగళవారం జరిగింది. ఈ సందర్భంగా వేముల బక్కయ్య మాట్లాడుతూ వ్యవసాయాన్ని, రైతులను రక్షించేందుకు పాలకవర్గ విధానాలకు వ్యతిరేకంగా రైతులు ఐక్యంగా ఉద్యమించాలని కోరారు. అభివృద్ధి పేరుతో బలవంతపు భూసేకరణ విధానాలను అడ్డుకోవాలని, అటవీ చట్టాలను సవరించి ఆదానీ, అంబానీలకు భూములను కట్టబెట్టే విధానాలను వ్యతిరేకించాలని అన్నారు. 2014 నుంచి కేంద్రంలో అధికారంలో ఉన్న బీజేపీ ప్రభుత్వం తీసుకొచ్చిన మూడు వ్యవసాయ నల్ల చట్టాలకు వ్యతిరేకంగా సంయుక్త కిసాన్ మోర్చా ఆధ్వర్యంలో దేశ రాజధానిలో 13 నెలల పాటు చారిత్రక పోరాటం జరిగిందని, 750 మంది రైతుల త్యాగాల ఫలితంగా ఆ చట్టాలను రద్దు చేయాల్సి వచ్చిందని పేర్కొన్నారు. ప్రస్తుతం అవే విధానాలను మరో రూపంలో అమలు చేసేందుకు ప్రయత్నాలు జరుగుతున్నాయని ఆరోపించారు. రాష్ట్రంలో ఇప్పటికే సుమారు 13 లక్షల ఎకరాలకు పైగా ప్రత్యేక ఆర్థిక మండళ్ల కోసం సేకరించిన భూములు ఖాళీగా ఉన్నాయని, వాటిని వినియోగించకుండా మూడు పంటలు పండే సారవంతమైన భూములను సేకరించడం సరికాదన్నారు. మహాత్మా గాంధీ జాతీయ గ్రామీణ ఉపాధి హామీ చట్టాన్ని యథావిధిగా కొనసాగించాలని డిమాండ్ చేశారు. రైతుల భూములను జాయింట్ కలెక్టర్ క్షేత్రస్థాయిలో పరిశీలించి, అర్హులైన సాగుదారులకు పట్టాలు మంజూరు చేయాలని కోరారు. కౌలు రైతులందరికీ భూ యజమానితో సంబంధం లేకుండా గుర్తింపు కార్డులు ఇవ్వాలని, హామీ లేని రుణాలు మంజూరు చేయాలని డిమాండ్ చేశారు. ప్రకృతి వైపరీత్యాల కారణంగా పంటలు నష్టపోయిన రైతులకు నేరుగా నష్టపరిహారం అందించాలని కోరారు. స్వామినాథన్ కమిటీ సిఫారసుల ప్రకారం పంటలకు ఉత్పత్తి వ్యయానికి అదనంగా 50 శాతం మద్దతు ధర కల్పించాలని అన్నారు. రైతులకు రుణ విమోచన చట్టం తీసుకురావాలని, ఉచిత విద్యుత్ కొనసాగించాలని, స్మార్ట్ మీటర్లను రద్దు చేయాలని డిమాండ్ చేశారు. ఏలూరు జిల్లాలో పేదలు సాగు చేసుకుంటున్న అటవీ భూములకు సంబంధించి జారీ చేసిన నాలుగు నోటిఫికేషన్లను రద్దు చేయాలని కోరారు. 60 సంవత్సరాలు పైబడిన సన్న, చిన్నకారు రైతులకు నెలకు రూ.10 వేల పింఛన్ అందించాలని, ధరల స్థిరీకరణ నిధిని ఏర్పాటు చేయాలని డిమాండ్ చేశారు. అన్ని పంటలకు పంటల బీమా పథకాన్ని వర్తింపజేసి, బీమా ప్రీమియాన్ని ప్రభుత్వమే చెల్లించాలని కోరారు. మెట్ట ప్రాంత రైతులకు వరప్రదాయినిగా భావించే చింతలపూడి ఎత్తిపోతల పథకం రెండో దశను తక్షణమే పూర్తి చేయాలని, కార్మిక వ్యతిరేక నాలుగు కార్మిక చట్టాలను రద్దు చేయాలని డిమాండ్ చేశారు. రైతుల సమస్యల పరిష్కారం కోసం అఖిలభారత కిసాన్ మహాసభ ఆధ్వర్యంలో జరిగే ఉద్యమాల్లో రైతు సోదరులు భుజం భుజం కలిపి పాల్గొనాలని పిలుపునిచ్చారు. భగత్ సింగ్ పుట్టిన గడ్డ పంజాబ్‌లోని జలంధర్‌లో సెప్టెంబర్ 20, 21 తేదీల్లో జరగనున్న ఐదో జాతీయ మహాసభలను విజయవంతం చేయాలని, అందుకు ఆర్థిక, హార్దిక సహకారం అందించాలని వేముల బక్కయ్య కోరారు. ఈ కార్యక్రమంలో మేడూరి సర్వీసు, మేడూరి స్వర్ణకుమారి, నందిపాము రాణి, దార బేబీ శాలిని, పల్లెపాము భవాని తదితరులు పాల్గొన్నారు.