అనకాపల్లి: రూ.3 కోట్ల విలువైన 600 కిలోల గంజాయి పట్టివేత

అనకాపల్లి రూరల్ పోలీసుల మెరుపుదాడి.. ముగ్గురు అరెస్ట్

పైలట్ కారుతో పక్కా ప్లాన్.. ముగ్గురు పరారీ

అనకాపల్లి, సెప్టెంబర్ 3: గంజాయి అక్రమ రవాణాపై అనకాపల్లి రూరల్ పోలీసులు ఉక్కుపాదం మోపారు. ఒడిశా నుంచి అనకాపల్లి మీదుగా తుని వైపు తరలిస్తున్న 600 కిలోల గంజాయిని పోలీసులు పట్టుకున్నారు. దీని విలువ సుమారు రూ.3 కోట్లు ఉంటుందని పోలీసులు తెలిపారు. గంజాయి తరలింపునకు ఉపయోగించిన వ్యాన్‌తో పాటు ముందుగా మార్గాన్ని పరిశీలిస్తూ వెళ్తున్న హోండా సివిక్ కారును స్వాధీనం చేసుకున్నారు. ఈ ఘటనలో ముగ్గురు నిందితులను అరెస్ట్ చేయగా.. మరో ముగ్గురు పరారీలో ఉన్నట్లు పోలీసులు వెల్లడించారు.

జిల్లా ఎస్పీ తుహిన్ సిన్హా గురువారం నిర్వహించిన మీడియా సమావేశంలో ఈ వివరాలను వెల్లడించారు. జిల్లాను గంజాయి రహిత ప్రాంతంగా తీర్చిదిద్దే లక్ష్యంతో పోలీసులు నిరంతరం తనిఖీలు నిర్వహిస్తున్నారని తెలిపారు.

జైలు పరిచయంతో భారీ దందాకు తెర

పోలీసుల దర్యాప్తు ప్రకారం పశ్చిమ గోదావరి జిల్లా ధర్మాజీగూడెంకు చెందిన షేక్ మస్తాన్ వలి (ఏ-1) గతంలో గంజాయి కేసులో విశాఖపట్నం సెంట్రల్ జైలులో ఉన్న సమయంలో నర్సీపట్నానికి చెందిన ఏ-3తో పరిచయం ఏర్పడింది. జైలు పరిచయం క్రమంగా గంజాయి రవాణా ముఠాగా మారినట్లు పోలీసులు తెలిపారు.

ఒడిశా రాష్ట్రం మల్కన్‌గిరి జిల్లా చిత్రకొండ పరిధిలోని దగుడుపల్లి ప్రాంతం నుంచి 600 కిలోల గంజాయిని సేకరించి, తుని సమీపంలో అప్పగించేలా ఒప్పందం కుదిరినట్లు వెల్లడించారు. సరుకు ధరకు అదనంగా ఏ-3కు రూ.3 లక్షల కమీషన్ చెల్లించేలా వ్యవహారం సాగినట్లు పోలీసులు తెలిపారు.

చెక్‌పోస్టులకు చిక్కకుండా వ్యూహం

పోలీసుల తనిఖీల నుంచి తప్పించుకునేందుకు నిందితులు పక్కా ప్రణాళిక వేసినట్లు దర్యాప్తులో తేలింది. ఒడిశా సరిహద్దు ప్రాంతాల నుంచి గంజాయిని ముందుగా నడక, మోటార్‌సైకిళ్ల ద్వారా దఫదఫాలుగా తరలించి, అనంతరం వ్యాన్‌లోకి లోడ్ చేసినట్లు పోలీసులు తెలిపారు.

ఏపీ39 వీఏ 6786 నంబరు గల వ్యాన్‌లో గంజాయిని తరలిస్తుండగా, దాని ముందు ఏపీ16 బీసీ 0018 నంబరు గల హోండా సివిక్ కారును పైలట్ వాహనంగా ఏర్పాటు చేశారు. పోలీసుల కదలికలను ముందుగానే గుర్తించి మార్గాన్ని సురక్షితం చేసేందుకు ఈ పద్ధతిని అనుసరించినట్లు పోలీసులు పేర్కొన్నారు.

సంపతిపురం జంక్షన్ వద్ద పోలీసుల మెరుపుదాడి

విశ్వసనీయ సమాచారం అందుకున్న అనకాపల్లి రూరల్ పోలీసులు వెంటనే అప్రమత్తమయ్యారు. రూరల్ ఎస్సై జి. రవికుమార్ ఆధ్వర్యంలోని పోలీసు సిబ్బంది అనకాపల్లి మండలం సంపతిపురం జంక్షన్ వద్ద మాటువేశారు.

గంజాయి లోడుతో వెళ్తున్న వ్యాన్‌ను, దాని ముందు వెళ్తున్న పైలట్ కారును పోలీసులు అడ్డుకున్నారు. వాహనాలను క్షుణ్ణంగా తనిఖీ చేయగా భారీ మొత్తంలో గంజాయి బయటపడింది. దీంతో 600 కిలోల గంజాయిని స్వాధీనం చేసుకుని, వాహనాలను సీజ్ చేశారు.

ముగ్గురు అరెస్ట్.. మరో ముగ్గురి కోసం గాలింపు

ఈ కేసులో పోలీసులు ముగ్గురిని అరెస్ట్ చేశారు.

షేక్ మస్తాన్ వలి (ఏ-1) – ధర్మాజీగూడెం, పశ్చిమ గోదావరి జిల్లా

షేక్ మదీనా (ఏ-4)

పాంగి రత్నాలు (ఏ-6) – అల్లూరి సీతారామరాజు జిల్లా

మరోవైపు ఏ-2 (ఒడిశా), ఏ-3 (నర్సీపట్నం), ఏ-5 (అల్లూరి సీతారామరాజు జిల్లా) పరారీలో ఉన్నట్లు పోలీసులు తెలిపారు. వారి ఆచూకీ కోసం ప్రత్యేక బృందాలను ఏర్పాటు చేసి గాలింపు చేపట్టారు.

గతంలోనూ గంజాయి కేసులు

ఈ ముఠాలోని పలువురు నిందితులకు గతంలోనూ గంజాయి కేసులతో సంబంధం ఉన్నట్లు పోలీసులు వెల్లడించారు. ఏ-1 షేక్ మస్తాన్ వలిపై జి.మాడుగుల, కిర్లంపూడి పోలీస్ స్టేషన్ల పరిధిలో రెండు కేసులు నమోదై ఉన్నాయని తెలిపారు.

ఏ-3పై గొలుగొండ, మార్టూరు, కిర్లంపూడి, జగ్గంపేట, టంగుటూరు పోలీస్ స్టేషన్ల పరిధిలో మొత్తం ఐదు గంజాయి కేసులు ఉన్నట్లు పోలీసులు పేర్కొన్నారు. అతనిపై పీఐటీ–ఎన్‌డీపీఎస్ చట్టం కింద నిర్బంధ చర్యలు తీసుకునేందుకు ప్రభుత్వానికి ప్రతిపాదనలు పంపినట్లు తెలిపారు.

ఏ-6 పాంగి రత్నాలుపై జి.మాడుగుల పోలీస్ స్టేషన్ పరిధిలో ఒక గంజాయి కేసు నమోదై ఉన్నట్లు వెల్లడించారు.

పోలీసు సిబ్బందికి ఎస్పీ అభినందనలు

భారీ స్థాయిలో గంజాయి రవాణా చేస్తున్న ముఠాను పట్టుకోవడంలో సమర్థంగా పనిచేసిన పోలీసు అధికారులు, సిబ్బందిని ఎస్పీ తుహిన్ సిన్హా అభినందించారు.

ఈ సందర్భంగా ఎస్‌బీ సీఐ ఎస్. బాల సూర్యరావు, అనకాపల్లి టౌన్ సీఐ జి. ప్రేమకుమార్, రూరల్ సీఐ జి. అశోక్‌కుమార్, రూరల్ ఎస్సై జి. రవికుమార్, టౌన్ ఎస్సై షేక్ జిలాని, ఈగల్ బృందం సీఐలు టి. ధనుంజయ నాయుడు, వి. నాగరాజుతో పాటు పోలీసు సిబ్బందికి నగదు ప్రోత్సాహకాలు, ప్రశంసాపత్రాలు అందజేశారు.

మత్తు పదార్థాలపై కఠిన చర్యలు

జిల్లాలో గంజాయి, ఇతర మత్తు పదార్థాల అక్రమ విక్రయాలు, రవాణాపై కఠిన చర్యలు కొనసాగుతాయని ఎస్పీ స్పష్టం చేశారు. అక్రమ మత్తు పదార్థాల వ్యాపారానికి పాల్పడే వారిపై పీఐటీ–ఎన్‌డీపీఎస్, పీడీ చట్టం వంటి కఠిన చట్టాల కింద చర్యలు తీసుకుంటామని హెచ్చరించారు.

మీడియా సమావేశంలో అదనపు ఎస్పీ ఎల్. మోహనరావు, మహిళా పోలీస్ స్టేషన్ డీఎస్పీ ఈ. శ్రీనివాసులుతో పాటు పలువురు పోలీసు అధికారులు, సిబ్బంది పాల్గొన్నారు.