పోలిశెట్టిపాడు గ్రామంలో ప్రజలకు మెరుగైన సేవలు అందించాలి

పారిశుద్ధ్యంపై ప్రత్యేక దృష్టి సారించాలి.. అధికారులకు తిరువూరు ఆర్డీఓ ఏ. కుమార్ ఆదేశం

ఏ. కొండూరు, ఎన్టీఆర్ జిల్లా: గ్రామీణ ప్రాంతాల్లో ప్రజలకు మెరుగైన ప్రభుత్వ సేవలు అందించడంతో పాటు పారిశుద్ధ్య నిర్వహణపై ప్రత్యేక దృష్టి సారించాలని తిరువూరు రెవెన్యూ డివిజనల్ అధికారి ఏ. కుమార్ అధికారులను ఆదేశించారు. ఏ. కొండూరు మండలం పోలిశెట్టిపాడు గ్రామ సచివాలయాన్ని ఆయన తనిఖీ చేసి, గ్రామంలో అమలవుతున్న వివిధ ప్రభుత్వ సేవలు, పారిశుద్ధ్య పనుల తీరును సమీక్షించారు. ఈ సందర్భంగా ఆర్డీఓ మాట్లాడుతూ గ్రామ పరిసరాలను ఎప్పటికప్పుడు పరిశుభ్రంగా ఉంచాలని, పారిశుద్ధ్య పనులు నిరంతరం కొనసాగేలా అధికారులు పర్యవేక్షించాలని సూచించారు. మురుగునీరు నిల్వ ఉండకుండా చర్యలు తీసుకోవాలని, దోమల నివారణకు తగిన జాగ్రత్తలు పాటించాలని ఆదేశించారు. సీజనల్ వ్యాధులు ప్రబలకుండా ముందస్తు చర్యలు చేపట్టాలని, ఏఎన్ఎంలు, ఆశా కార్యకర్తలు, వైద్య సిబ్బంది నిరంతరం అప్రమత్తంగా ఉండాలని స్పష్టం చేశారు. ప్రజలకు అవసరమైన వైద్య సేవలు సకాలంలో అందేలా చూడాలని సూచించారు. అలాగే గ్రామ సచివాలయ సిబ్బంది ప్రజలకు నిరంతరం అందుబాటులో ఉండాలని, వారి సమస్యలను నిర్లక్ష్యం చేయకుండా సత్వరమే పరిష్కరించాలని ఆదేశించారు. ప్రభుత్వ సంక్షేమ పథకాలు, ప్రజలకు అందించే సేవల్లో పూర్తి పారదర్శకత పాటించాలని, అర్హులైన ప్రతి ఒక్కరికీ ప్రభుత్వ ఫలాలు అందేలా బాధ్యతగా విధులు నిర్వహించాలని సూచించారు. అనంతరం గ్రామ సచివాలయంలోని వివిధ రికార్డులను పరిశీలించిన ఆర్డీఓ వాటి నిర్వహణపై సిబ్బందికి పలు సూచనలు చేశారు. విధుల నిర్వహణలో నిర్లక్ష్యం వహించకుండా ప్రజలకు మెరుగైన సేవలు అందించడమే లక్ష్యంగా పనిచేయాలని అధికారులకు స్పష్టం చేశారు.