చాట్రాయిలో మహిళల భద్రతపై అవగాహన సదస్సు
చాట్రాయిలో మహిళల భద్రతపై అవగాహన సదస్సు
ఏలూరు జిల్లా చాట్రాయి మండలం తుమ్మగూడెం గ్రామంలో మహిళల భద్రత, రక్షణ అంశాలపై చాట్రాయి పోలీస్ స్టేషన్ ఎస్ఐ డి. రామకృష్ణ ఆధ్వర్యంలో అవగాహన సదస్సు నిర్వహించారు.
ఏలూరు జిల్లా ఎస్పీ కె. ప్రతాప్ శివ కిషోర్, నూజివీడు డీఎస్పీ కె.వి.వి.ఎన్.వి. ప్రసాద్ ఆదేశాల మేరకు, నూజివీడు రూరల్ సర్కిల్ ఇన్స్పెక్టర్ ఐ.వి. నాగేంద్ర కుమార్ పర్యవేక్షణలో ఈ కార్యక్రమం జరిగింది.
సదస్సులో మహిళలకు చట్టపరమైన హక్కులు, మహిళల రక్షణ కోసం ప్రభుత్వం మరియు పోలీసు శాఖ అందిస్తున్న సేవలు, అత్యవసర పరిస్థితుల్లో సంప్రదించాల్సిన హెల్ప్లైన్ నంబర్లు, సైబర్ నేరాల పట్ల అప్రమత్తత, బాలికలు మరియు మహిళలపై జరిగే వేధింపులను నివారించేందుకు తీసుకోవాల్సిన జాగ్రత్తల గురించి వివరించారు.
మహిళలు ఎలాంటి సమస్యలు ఎదురైనా నిర్భయంగా పోలీసులను సంప్రదించాలని, వారి భద్రతకు పోలీసు శాఖ ఎల్లప్పుడూ అండగా ఉంటుందని ఎస్ఐ డి. రామకృష్ణ తెలిపారు.
మహిళల భద్రత కుటుంబం, సమాజం, ప్రభుత్వ ఉమ్మడి బాధ్యత అని పేర్కొంటూ, సురక్షిత సమాజ నిర్మాణంలో ప్రతి ఒక్కరూ భాగస్వాములు కావాలని సూచించారు.
ఈ కార్యక్రమంలో గ్రామ మహిళలు, యువతులు, గ్రామ పెద్దలు, పోలీసు సిబ్బంది పాల్గొన్నారు. మహిళల భద్రతపై అవగాహన పెంపొందించడంలో ఇటువంటి కార్యక్రమాలు కీలక పాత్ర పోషిస్తాయని ఎస్ఐ డి. రామకృష్ణ తెలిపారు.
