చిన్న వయసులోనే గుండెపోటుతో డాక్టర్ లావణ్య మృతి.. నెల్లూరులో తీరని విషాదం

న్యూరాలజీలో గోల్డ్ మెడల్ సాధించిన ప్రతిభావంతురాలు.. సోషల్ మీడియా వేదికగా ఎంతోమందికి వైద్య సలహాలు అందిస్తూ గుర్తింపు తెచ్చుకున్న డాక్టర్ లావణ్య అకాల మరణం నెల్లూరులో తీవ్ర విషాదాన్ని నింపింది. చిన్న వయసులోనే గుండెపోటుకు గురై ఆమె ప్రాణాలు కోల్పోవడం కుటుంబ సభ్యులు, బంధువులు, వైద్యవర్గాలను దిగ్భ్రాంతికి గురిచేసింది. వైద్యం అందించేలోపే ఆమె మరణించినట్లు సమాచారం. వైద్య రంగంలో ఉన్నత విద్యను అభ్యసించి న్యూరాలజీలో గోల్డ్ మెడల్ సాధించిన లావణ్య తన ప్రతిభతో ప్రత్యేక గుర్తింపు పొందారు. సోషల్ మీడియా ద్వారా ప్రజలకు ఆరోగ్యంపై అవగాహన కల్పిస్తూ, వైద్యపరమైన సందేహాలకు సలహాలు అందిస్తూ ఎంతోమందికి చేరువయ్యారు. అయితే ఆమెకు ప్రాణాంతకమైన ఆటో ఇమ్యూన్ నరాల సంబంధిత వ్యాధి ఉన్నట్లు వెలుగులోకి వచ్చినట్లు సమాచారం. విషాదకరమైన విషయం ఏమిటంటే.. ఆమె తండ్రి వైద్యుడు కాగా, భర్త కూడా వైద్య వృత్తిలోనే ఉన్నారు. కుటుంబంలో ఇద్దరు వైద్యులు ఉన్నప్పటికీ, అనూహ్యంగా సంభవించిన ఆరోగ్య సమస్య నుంచి డాక్టర్ లావణ్యను కాపాడలేకపోయారు. వైద్య చికిత్స అందేలోపే ఆమె కన్నుమూయడం కుటుంబానికి తీరని లోటుగా మారింది. వైద్యురాలిగా ఎంతో భవిష్యత్తు ఉన్న యువ ప్రతిభను కోల్పోవడం వైద్య సమాజానికి తీరని నష్టంగా పలువురు అభిప్రాయపడుతున్నారు. ఎంతోమందికి ఆరోగ్య సలహాలు అందించిన ఆమె అకాల మరణవార్త తెలిసి సోషల్ మీడియాలో సంతాప సందేశాలు వెల్లువెత్తుతున్నాయి