చాట్‌జీపీటీ సాయంతో హర్యానా సివిల్ సర్వీసెస్‌లో ఛావికి ఐదో ర్యాంకు
హిసార్: చాట్‌జీపీటీని అధ్యయన సహాయక సాధనంగా ఉపయోగించుకుంటూ సొంతంగా సిద్ధమైన హిసార్‌కు చెందిన ఛావి హర్యానా సివిల్ సర్వీసెస్ పరీక్షలో ఐదో ర్యాంకు సాధించినట్లు సమాచారం. మొత్తం 675 మార్కులకు 385.80 మార్కులు సాధించి ప్రతిభ చాటింది.
బీఏ ఎల్‌ఎల్‌బీ చదువుతూనే సివిల్ సర్వీసెస్ పరీక్షకు సిద్ధమైన ఛావి రోజుకు సుమారు ఎనిమిది గంటల పాటు చదివినట్లు తెలుస్తోంది. సోషల్ మీడియాకు దూరంగా ఉంటూ చదువుపై దృష్టి సారించింది. చదువులో ఎదురైన సందేహాలను నివృత్తి చేసుకోవడానికి చాట్‌జీపీటీని ఉపయోగించుకుంది.
ఈ పరీక్షకు దాదాపు 60 వేల మంది హాజరైనట్లు సమాచారం. వారిలో ఛావి ఐదో ర్యాంకు సాధించి తన కుటుంబంలో ప్రభుత్వ ఉద్యోగం పొందనున్న తొలి వ్యక్తిగా నిలిచింది.
స్వీయ అధ్యయనం, క్రమశిక్షణతో పాటు సాంకేతికతను చదువుకు అనుగుణంగా ఉపయోగించుకోవడం తన విజయానికి తోడ్పడిన అంశాలుగా ఛావి ప్రయాణం నిలుస్తోంది.
