డోన్‌లో ఆర్టీసీ బస్సు బీభత్సం తప్పింది.. యువతిని తప్పించే క్రమంలో ప్రమాదం

డోన్, జూలై 2 (ప్రజా సమాచార్): నంద్యాల జిల్లా డోన్ పట్టణంలోని ఐటీఐ సమీపంలో గురువారం ఆర్టీసీ బస్సు ప్రమాదానికి గురైంది. రోడ్డు దాటుతున్న ఓ యువతి ఒక్కసారిగా బస్సుకు అడ్డంగా రావడంతో, ఆమెను తప్పించే ప్రయత్నంలో డ్రైవర్‌ బస్సును మలుపు తిప్పగా అదుపు తప్పి ప్రమాదం చోటుచేసుకుంది.

అయితే ఈ ఘటనలో బస్సులో ప్రయాణిస్తున్న ప్రయాణికులకు గానీ, రోడ్డు దాటుతున్న యువతికి గానీ ఎలాంటి గాయాలు కాకపోవడంతో అంతా ఊపిరి పీల్చుకున్నారు. ప్రమాదం కారణంగా కొద్దిసేపు ఆ ప్రాంతంలో స్వల్ప ట్రాఫిక్ అంతరాయం ఏర్పడింది.

సమాచారం అందుకున్న పోలీసులు వెంటనే ఘటనాస్థలికి చేరుకుని పరిస్థితిని సమీక్షించారు. ప్రమాదానికి గల పూర్తి కారణాలు, ఇతర వివరాలు తెలియాల్సి ఉంది.