IIT బాంబే విద్యార్థి సాహిల్ మృతి.. కుల వివక్ష ఆరోపణలు

తండ్రి ఫిర్యాదుతో FIR.. పరీక్షలో ChatGPT వినియోగంపై IIT బాంబే వివరణ

ముంబై: IIT బాంబేలో బీటెక్ రెండో సంవత్సరం చదువుతున్న సాహిల్ వాకోడే ఆత్మహత్య ఘటన తీవ్ర చర్చకు దారితీసింది. ఈ ఘటనకు కుల వివక్ష, వేధింపులు కారణమని సాహిల్ తండ్రి ఆరోపించగా.. పరీక్ష సమయంలో మొబైల్ ఫోన్ ఉపయోగించి ప్రశ్నాపత్రాన్ని ChatGPTలో అప్‌లోడ్ చేసి సమాధానాలు పొందేందుకు ప్రయత్నించినట్లు IIT బాంబే తెలిపింది. ఈ వ్యవహారంపై పోలీసులు దర్యాప్తు కొనసాగిస్తున్నారు.

సాహిల్ గత మూడు నెలలుగా కులపరమైన వేధింపులకు గురైనట్లు తన తండ్రి పోలీసులకు ఇచ్చిన ఫిర్యాదులో ఆరోపించారు. డిపార్ట్‌మెంట్‌కు చెందిన ప్రొఫెసర్ సూర్యనారాయణ దూల్లా కులం పేరుతో అవమానకర వ్యాఖ్యలు చేశారని కూడా ఫిర్యాదులో పేర్కొన్నారు. ఈ ఫిర్యాదు ఆధారంగా పోలీసులు ఆత్మహత్యకు ప్రేరేపించారనే ఆరోపణలతో పాటు ఎస్సీ, ఎస్టీ అట్రాసిటీస్ చట్టంలోని నిబంధనల కింద కేసు నమోదు చేసినట్లు నివేదికలు పేర్కొంటున్నాయి.

మరోవైపు, పరీక్ష సందర్భంగా సాహిల్ మొబైల్ ఫోన్ ఉపయోగించినట్లు IIT బాంబే అధికారికంగా తెలిపింది. పరీక్ష ప్రశ్నాపత్రాన్ని ChatGPTలో అప్‌లోడ్ చేసి సమాధానాలు పొందేందుకు ప్రయత్నించినట్లు పేర్కొంది. అయితే ఈ ఘటనపై ఎలాంటి క్రమశిక్షణా చర్యలు ప్రారంభించలేదని, ఇన్‌స్ట్రక్టర్ మరియు విభాగాధిపతి సాహిల్‌తో మాట్లాడి కౌన్సెలింగ్ ఇచ్చారని, ఈ ఘటన అతడి విద్యా భవిష్యత్తుపై ప్రతికూల ప్రభావం చూపదని హామీ ఇచ్చారని సంస్థ తెలిపింది.

ఆ తర్వాత సాహిల్ హాస్టల్ గదికి వెళ్లగా, అదే రోజు సాయంత్రం అతడు మృతి చెందినట్లు పోలీసులు తెలిపారు. ఘటన అనంతరం IIT బాంబే క్యాంపస్‌లో విద్యార్థులు నిరసనలకు దిగారు. 400 మందికి పైగా విద్యార్థులు ఆందోళనలో పాల్గొన్నట్లు నివేదికలు పేర్కొన్నాయి.

కుల వివక్షకు సంబంధించిన ఆరోపణలను IIT బాంబే ఖండించింది. సాహిల్ తనకు ఎదురైన కుల వివక్షపై సంస్థలోని SC-ST సెల్‌కు లేదా పరిపాలనకు ఎలాంటి ఫిర్యాదు చేయలేదని సంస్థ తెలిపింది. ప్రస్తుతం పోలీసుల దర్యాప్తు కొనసాగుతున్నందున ఊహాగానాలకు దూరంగా ఉండాలని, దర్యాప్తు అధికారులకు పూర్తిగా సహకరిస్తామని IIT బాంబే వెల్లడించింది.

ఈ ఘటనకు దారితీసిన పరిస్థితులు, విద్యార్థి చేసిన ఆరోపణలు, పరీక్ష సమయంలో జరిగిన పరిణామాలు వంటి అంశాలపై దర్యాప్తులో మరింత స్పష్టత వచ్చే అవకాశం ఉంది.