యజమాని అంత్యక్రియల వరకు వెంట.. శునకం విశ్వాసానికి గ్రామస్థులు భావోద్వేగం

మంచిర్యాల జిల్లాలో ఘటన.. చివరి వరకు మృతదేహం వద్దే ఉన్న శునకం

మంచిర్యాల జిల్లా, దండేపల్లి మండలం: యజమానిపై ఓ శునకం చూపించిన విశ్వాసం, అనుబంధం గ్రామస్థులను భావోద్వేగానికి గురిచేసింది. దండేపల్లి మండలం వెల్గనూర్ గ్రామంలో ఈ ఘటన చోటుచేసుకుంది.

గ్రామానికి చెందిన ఓ వ్యక్తి అనారోగ్యంతో మృతి చెందడంతో కుటుంబ సభ్యులు, బంధువులు అంత్యక్రియల కోసం మృతదేహాన్ని శ్మశానవాటికకు తరలించారు. ఈ క్రమంలో మృతుడి వద్ద పెంచుకున్న శునకం కూడా వారి వెంట శ్మశానవాటిక వరకు వెళ్లింది.

అక్కడ అంత్యక్రియలు పూర్తయ్యే వరకు మృతదేహం వద్దే ఉన్నట్లు స్థానికులు తెలిపారు. అనంతరం చితి చుట్టూ తిరుగుతూ కనిపించడంతో అక్కడున్న కుటుంబ సభ్యులు, గ్రామస్థులు భావోద్వేగానికి గురయ్యారు.

యజమాని చివరి ప్రయాణంలోనూ శునకం వెంట ఉండటం అక్కడున్న వారిని కదిలించింది. ఈ ఘటనతో మనుషులు–మూగజీవుల మధ్య ఏర్పడే అనుబంధం, విశ్వాసం మరోసారి చర్చకు వచ్చింది.