గంపలగూడెంలో దీనదయాళ్ ఉపాధ్యాయ జయంతి వేడుకలు

ఎన్టీఆర్ జిల్లా తిరువూరు నియోజకవర్గం గంపలగూడెం మండలంలో భారతీయ జనతా పార్టీ ఆధ్వర్యంలో శుక్రవారం పండిట్ దీనదయాళ్ ఉపాధ్యాయ జయంతి వేడుకలను ఘనంగా నిర్వహించారు. ఈ సందర్భంగా ఆయన చిత్రపటానికి పూలమాల వేసి నివాళులర్పించారు.

కార్యక్రమంలో వక్తలు మాట్లాడుతూ దీనదయాళ్ ఉపాధ్యాయ ప్రతిపాదించిన సిద్ధాంతాన్ని ‘ఏకాత్మ మానవతావాదం’గా పిలుస్తారని తెలిపారు. భారతీయ సంస్కృతి, సంప్రదాయాలు, సామాజిక విలువల ఆధారంగా ఆయన ఈ సిద్ధాంతాన్ని ప్రతిపాదించారని వివరించారు. సమాజంలోని చిట్టచివరి వ్యక్తికి కూడా అభివృద్ధి ఫలాలు అందేలా కృషి చేయాలన్నది దీనదయాళ్ ఉపాధ్యాయ ఆలోచనల్లో ప్రధాన అంశమని పేర్కొన్నారు. ఆయన ఆశయాలు, సిద్ధాంతాలను ముందుకు తీసుకెళ్లాల్సిన బాధ్యత ప్రతి ఒక్కరిపై ఉందన్నారు. అనంతరం భారతమాతకు జై నినాదాలు చేశారు.

ఈ కార్యక్రమంలో బీజేపీ మండల అధ్యక్షురాలు వనమా సత్యవాణి, భారతీయ జనతా పార్టీ జిల్లా కార్యవర్గ సభ్యులు కొనపర్తి నాగగోపాలకృష్ణ, మండల బీజేపీ ప్రధాన కార్యదర్శి వనమా పద్మావతి, పాపోలు నరసింహారావు, తరిగొప్పుల సత్యనారాయణ, కొనపర్తి విజయలక్ష్మి తదితరులు పాల్గొన్నారు.