రైతులకు ఆధునిక సాగు పద్ధతులపై అవగాహన

ఖేత్ బచావో అభియాన్ రబీ–2026లో భాగంగా విస్సన్నపేట మండలంలో కార్యక్రమాలు

ఎన్టీఆర్ జిల్లా, విస్సన్నపేట: రైతులకు భూసార పరిరక్షణ, సమతుల్య ఎరువుల వినియోగం, పంటలలో చీడపీడల నివారణపై అవగాహన కల్పించేందుకు ఖేత్ బచావో అభియాన్ రబీ–2026 కార్యక్రమంలో భాగంగా డా. కె.ఎల్. రావు కృషి విజ్ఞాన కేంద్రం, గరికపాడు ఆధ్వర్యంలో విస్సన్నపేట మండలంలోని విస్సన్నపేట, తెల్లదేవరపల్లి, పుట్రేల గ్రామాల్లో రైతులకు అవగాహన కార్యక్రమాలు నిర్వహించారు. ఈ సందర్భంగా వ్యవసాయ శాస్త్రవేత్తలు, వ్యవసాయ శాఖ అధికారులు రైతులకు పలు సూచనలు అందిస్తూ, పంటల సాగులో శాస్త్రీయ పద్ధతులు పాటించడం ద్వారా పెట్టుబడి ఖర్చులు తగ్గించుకోవడంతో పాటు అధిక దిగుబడులు సాధించే అవకాశాలపై వివరించారు. జిల్లా వనరుల కేంద్రం డీడీఏ వెంకటేశ్వరరావు సమగ్ర ఎరువుల యాజమాన్యం, జీవ ఎరువుల వినియోగం, భూసార పరీక్షల ఆధారంగా ఎరువులు వాడాల్సిన ఆవశ్యకతపై రైతులకు అవగాహన కల్పించారు. నేలలో ఉన్న పోషకాలను గుర్తించి, పంట అవసరాలకు అనుగుణంగా ఎరువులు వినియోగించడం ద్వారా సాగు ఖర్చులను నియంత్రించవచ్చని వివరించారు. డాక్టర్ ఎన్. రాజశేఖర్ మాట్లాడుతూ, ఖేత్ బచావో అభియాన్ కార్యక్రమం ముఖ్య ఉద్దేశాలను వివరించారు. భూసార పరీక్షల ప్రాముఖ్యత, పరీక్షల ఆధారంగా సమతుల్య ఎరువుల వినియోగం, జీవ ఎరువులు, జీవ శిలీంధ్రనాశనుల వినియోగం, నేల ఆరోగ్య పరిరక్షణతో పాటు ప్రకృతి వ్యవసాయ పద్ధతులపై రైతులకు అవగాహన కల్పించారు. భూసారాన్ని కాపాడుకుంటూ పర్యావరణహిత వ్యవసాయ పద్ధతులను అనుసరించడం ద్వారా దీర్ఘకాలంలో సాగును లాభదాయకంగా మార్చుకోవచ్చని సూచించారు. డాక్టర్ శివప్రసాద్ మాట్లాడుతూ, పత్తి పంటలో గులాబీ రంగు పురుగు, వరి పంటలో సుడి దోమ, అగ్గి తెగులు నివారణకు తీసుకోవాల్సిన జాగ్రత్తలను వివరించారు. పంటలను నిరంతరం పరిశీలిస్తూ చీడపీడలు, తెగుళ్ల లక్షణాలను ప్రారంభ దశలోనే గుర్తించి, వ్యవసాయ శాఖ సూచనల మేరకు సకాలంలో నివారణ చర్యలు చేపట్టాలని తెలిపారు. డాక్టర్ కె. లక్ష్మీకళ మాట్లాడుతూ, మామిడి పంటలో కోతకు ముందు, కోత అనంతరం తీసుకోవాల్సిన జాగ్రత్తలపై రైతులకు సూచనలు అందించారు. ప్రస్తుత పరిస్థితుల్లో మిరప, వంగ, టమాటా వంటి ఉద్యాన పంటల్లో ఆశించే పురుగులు, తెగుళ్ల నివారణ చర్యలతో పాటు సమగ్ర ఎరువుల యాజమాన్య పద్ధతులను వివరించారు. పంటల్లో పురుగుల ఉధృతిని ముందుగానే గుర్తించేందుకు లింగాకర్షక బుట్టలు, జిగురు అట్టలను వినియోగించాలని, వీటి ద్వారా పురుగుల ఉనికిని గమనించి తగిన సమయంలో నివారణ చర్యలు చేపట్టవచ్చని తెలిపారు. ఈ కార్యక్రమంలో విస్సన్నపేట వ్యవసాయ సహాయ సంచాలకులు కె. శశికళ, వ్యవసాయ అధికారి జి. రాజ్యలక్ష్మి, గరికపాడు కృషి విజ్ఞాన కేంద్రం శాస్త్రవేత్తలు, జిల్లా వనరుల కేంద్రం వ్యవసాయ అధికారి పద్మజారాణి, ఏఈవో ఉషారాణి, ప్రకృతి వ్యవసాయ విభాగం ఇన్‌చార్జి శ్రీనివాసరావు, గ్రామీణ ఉద్యాన సహాయకులు, గ్రామీణ వ్యవసాయ సహాయకులు, స్థానిక రైతులు పాల్గొన్నారు.