తుఫాను హెచ్చరికల నేపథ్యంలో రైతులు అప్రమత్తంగా ఉండాలి

పంటలు, ధాన్యం రక్షణకు ముందస్తు జాగ్రత్తలు తప్పనిసరి

మండల వ్యవసాయాధికారి జీ. రాజ్యలక్ష్మీ

ఎన్టీఆర్ జిల్లా, విస్సన్నపేట: తుఫాను హెచ్చరికల నేపథ్యంలో రైతులు అప్రమత్తంగా ఉండాలని విస్సన్నపేట మండల వ్యవసాయాధికారి జీ. రాజ్యలక్ష్మీ సూచించారు. ఈ నెల 27, 28 తేదీల్లో ఈదురుగాలులతో కూడిన భారీ నుంచి అతిభారీ వర్షాలు కురిసే అవకాశం ఉందన్న వాతావరణ శాఖ హెచ్చరికల నేపథ్యంలో రైతులు ముందస్తు జాగ్రత్తలు తీసుకోవాలని కోరారు. పంట నష్టాన్ని నివారించేందుకు రేపటి నుంచి నాలుగు రోజులపాటు పంట కోతలు చేపట్టవద్దని సూచించారు. ఇప్పటికే కోసిన ధాన్యం వర్షాలకు తడవకుండా టార్పాలిన్లతో పూర్తిగా కప్పి భద్రపరచాలని, వీలైనంత త్వరగా సురక్షితమైన గోదాములకు తరలించాలని తెలిపారు. పొలాల్లో వర్షపు నీరు నిల్వ ఉండకుండా మురుగు కాలువలను శుభ్రం చేసుకోవాలని, నీరు సాఫీగా బయటకు వెళ్లేలా చర్యలు తీసుకోవాలని సూచించారు. వర్షాలు కురిసే అవకాశం ఉన్నందున వాతావరణం అనుకూలించే వరకు పురుగుమందులు, ఎరువుల పిచికారీలను వాయిదా వేసుకోవాలని స్పష్టం చేశారు. వర్షాలు, ఈదురుగాలుల కారణంగా పంటలు దెబ్బతినకుండా రైతులు అప్రమత్తంగా వ్యవహరించాలని, వాతావరణ పరిస్థితులను ఎప్పటికప్పుడు గమనిస్తూ వ్యవసాయ శాఖ సూచనలను పాటించాలని మండల వ్యవసాయాధికారి జీ. రాజ్యలక్ష్మీ కోరారు.