గబ్బిలాలు వాలడంతో తెగిన విద్యుత్ వైర్లు… తప్పిన పెను ప్రమాదం

గబ్బిలాలు వాలడంతో తెగిన విద్యుత్ వైర్లు… తప్పిన పెను ప్రమాదం

మహబూబాబాద్ జిల్లా కొత్తగూడ మండలంలో బుధవారం రాత్రి అనూహ్య ఘటన చోటుచేసుకుంది. గోపాలపురం గ్రామ పరిధిలోని అటవీ ప్రాంతం గుండా వెళ్లే విద్యుత్ లైన్లపై గబ్బిలాలు ఒక్కసారిగా వాలడంతో భారీ శబ్దంతో షార్ట్ సర్క్యూట్ సంభవించింది. ఈ ఘటనలో మూడు చోట్ల విద్యుత్ తీగలు తెగిపడ్డాయి.

చీకటి సమయంలో ఏం జరుగుతుందో అర్థం కాక గ్రామస్తులు భయాందోళనకు గురయ్యారు. అయితే ఆ సమయంలో అక్కడ ఎవరూ లేకపోవడంతో పెద్ద ప్రమాదం తప్పింది.

సమాచారం అందుకున్న ఉప సర్పంచ్ అశోక్ వెంటనే స్పందించి విద్యుత్ శాఖ అధికారులను అప్రమత్తం చేశారు. గురువారం తెల్లవారుజామున అధికారులు సంఘటనా స్థలానికి చేరుకుని, స్థానికుల సహకారంతో మరమ్మతులు పూర్తి చేసి విద్యుత్ సరఫరాను పునరుద్ధరించారు.