22A పేరుతో పట్టాదారు రైతుల భూములపై కాంగ్రెస్ భూదందా

22A పేరుతో పట్టాదారు రైతుల భూములపై కాంగ్రెస్ భూదందా – నిజమైన హక్కుదారులను వెంటనే నిషేధిత జాబితా నుంచి తొలగించాలి:

జగిత్యాల జిల్లా తొలి జడ్పీ చైర్‌పర్సన్ దావ వసంత సురేష్  

రాయికల్ (NToday News):

రాయికల్ పట్టణంలో BRS నాయకులతో కలిసి జగిత్యాల జిల్లా తొలి జడ్పీ చైర్‌పర్సన్ దావ వసంత సురేష్ మీడియా సమావేశం నిర్వహించారు. ఈ సందర్భంగా కాంగ్రెస్ ప్రభుత్వంపై, ముఖ్యమంత్రి రేవంత్ రెడ్డి, రెవెన్యూ శాఖ మంత్రి పొంగులేటి శ్రీనివాస్ రెడ్డిలపై వారు తీవ్రస్థాయిలో ధ్వజమెత్తారు.

​పాత్రికేయుల సమావేశంలో దావ వసంత సురేష్ మాట్లాడిన ముఖ్యాంశాలు:

​22A పేరుతో కొత్త భూదందా: కాంగ్రెస్ ప్రభుత్వం అధికారంలోకి వచ్చి దాదాపు 3 ఏళ్లు కావస్తున్నా, అమలు కాని అనాలోచిత హామీలతో ప్రజలను మోసం చేసిందని మండిపడ్డారు. 22A నిషేధిత జాబితా పేరుతో పట్టాదారు రైతుల భూములపై కాంగ్రెస్ భూదందాకు తెరలేపిందని ఆరోపించారు.

​జగిత్యాలలో 16,005 ఎకరాల పట్టా భూముల నిలిపివేత: తెలంగాణ వ్యాప్తంగా కోటి ఎకరాలను, ఒక్క జగిత్యాల నియోజకవర్గంలోనే 16,005 ఎకరాల పట్టా భూములను నిషేధిత జాబితాలో చేర్చారని తెలిపారు. అధికారులకు లంచాలు ఇస్తేనే జాబితా నుంచి పేర్లు తొలగిస్తున్నారని విమర్శించారు.

​రైతులకు తెలియకుండానే భూముల బ్లాకింగ్: ప్రభుత్వ, దేవాదాయ, వక్ఫ్ భూములను కాపాడాల్సిన చట్టాన్ని పేద రైతుల మెడకు ఉరితాళ్లుగా మార్చారని, చాలామంది రైతులకు తమ భూములు 22A లో ఉన్నాయనే విషయమే తెలియక ఇబ్బందులు పడుతున్నారని అన్నారు.

​వెంటనే రెవెన్యూ సదస్సులు నిర్వహించాలి: గ్రామ గ్రామాన రెవెన్యూ సదస్సులు నిర్వహించి, నిజమైన పట్టాదార్లను వెంటనే నిషేధిత జాబితా నుంచి తొలగించాలని BRS పార్టీ తరఫున డిమాండ్ చేశారు.

​వ్యవసాయ రంగం నిర్వీర్యం: రాష్ట్రంలో 24 గంటల కరెంటు కోతలు, ఎరువుల కొరతతో రైతులు అరిగోస పడుతున్నారని అన్నారు. కాళేశ్వరం ప్రాజెక్టు నీళ్లను సద్వినియోగం చేసుకోలేక, ఎల్-నినో ముందస్తు జాగ్రత్తలు తీసుకోకుండా వ్యవసాయాన్ని నిర్వీర్యం చేశారని మండిపడ్డారు. రైతులకు ఎకరానికి ₹20,000 క్రాప్ హాలిడే పరిహారం ఇవ్వాలని డిమాండ్ చేశారు.

​ఈ కార్యక్రమంలో BRS పట్టణ, మండల అధ్యక్షుడు అనిల్ కుమార్, బర్కాం మల్లేష్, కో-ఆర్డినేటర్ తురగ శ్రీధర్ రెడ్డి, జగిత్యాల PACS చైర్మన్ మహిపాల్ రెడ్డి, నాయకులు గోపి రాజి రెడ్డి, బత్తిని నాగరాజు, ప్రశాంత్ రావు, రామపతి రావు, చాంద్ పాషా, సంతోష్ రావు, పడిగేలా గంగారెడ్డి, సత్యం గౌడ్ తదితరులు పాల్గొన్నారు.