కేటీఆర్, హరీష్ రావులపై మహిళా పోలీసు ఫిర్యాదు

అసెంబ్లీ వద్ద విధుల్లో ఉన్న మహిళా సిబ్బందితో అనుచితంగా ప్రవర్తించారంటూ ఆరోపణలు టీషర్టులు విప్పి అసభ్యకరంగా వ్యవహరించారని ఫిర్యాదులో ప్రస్తావన బలప్రయోగం, బెదిరింపులు, విధులకు ఆటంకం కలిగించారంటూ కేసు నమోదు

హైదరాబాద్: తెలంగాణ శాసనసభ సమావేశాల సందర్భంగా భద్రతా విధుల్లో ఉన్న మహిళా పోలీసులతో అనుచితంగా ప్రవర్తించారంటూ మాజీ మంత్రులు కేటీఆర్, హరీష్ రావు సహా పలువురు బీఆర్‌ఎస్ నాయకులపై మహిళా కానిస్టేబుల్ చేసిన ఫిర్యాదు సంచలనంగా మారింది. సెప్టెంబర్ 7న అసెంబ్లీ గేట్ నంబర్ 3 వద్ద చోటుచేసుకున్న ఘటనకు సంబంధించి ఆమె చేసిన ఫిర్యాదు ఆధారంగా పోలీసులు కేసు నమోదు చేసినట్లు సమాచారం. విధుల్లో ఉన్న తమపై దురుసుగా వ్యవహరించడంతో పాటు, బలప్రయోగం చేసి లోపలికి వెళ్లేందుకు ప్రయత్నించారని, మహిళా సిబ్బందిని అవమానించేలా ప్రవర్తించారని ఫిర్యాదులో ఆరోపించారు.

ఫిర్యాదు వివరాల ప్రకారం.. సెప్టెంబర్ 7న అసెంబ్లీ సమావేశాల సందర్భంగా మహిళా పోలీసులతో కలిసి గేట్ నంబర్ 3 వద్ద భద్రతా విధులు నిర్వహిస్తున్న సమయంలో ఉదయం సుమారు 9.30 గంటలకు హరీష్ రావు, కేటీఆర్‌తో పాటు పలువురు ఎమ్మెల్యేలు, ఎమ్మెల్సీలు, వారి అనుచరులు అక్కడికి వచ్చినట్లు పేర్కొన్నారు. వారిలో కొందరు కాంగ్రెస్ ప్రభుత్వ హామీల అమలుపై విమర్శలు చేస్తూ నినాదాలు రాసిన నల్ల టీషర్టులు ధరించి ఉన్నారని తెలిపారు.

అసెంబ్లీ భద్రతా నిబంధనల ప్రకారం రాజకీయ నినాదాలు, సందేశాలు ఉన్న టీషర్టులతో సభలోకి ప్రవేశించేందుకు అనుమతి లేదని సిబ్బంది వారికి వివరించినట్లు ఫిర్యాదులో పేర్కొన్నారు. నిబంధనలకు అనుగుణంగా సహకరించాలని కోరిన సమయంలో హరీష్ రావు మహిళా పోలీసులను ఉద్దేశించి అభ్యంతరకర వ్యాఖ్యలు చేశారని ఆరోపించారు.

అదే సమయంలో కేటీఆర్ కూడా మహిళా పోలీసులను ఉద్దేశించి అవమానకరంగా మాట్లాడారని ఫిర్యాదులో పేర్కొన్నారు. మహిళా సిబ్బందిని అడ్డుపెట్టుకుని ప్రభుత్వం రాజకీయాలు చేస్తోందంటూ నాయకులు తీవ్రస్థాయిలో వ్యాఖ్యలు చేశారని తెలిపారు. ఈ వ్యాఖ్యలతో విధుల్లో ఉన్న మహిళా పోలీసుల ఆత్మగౌరవం దెబ్బతిన్నదని ఫిర్యాదుదారు పేర్కొన్నారు.

తాము విధులు నిర్వర్తిస్తూ నిబంధనలను అమలు చేయడానికి ప్రయత్నించినప్పటికీ నాయకులు వెనక్కి తగ్గలేదని ఆమె తెలిపారు. ఈ క్రమంలో హరీష్ రావు తన టీషర్టును తొలగించి అక్కడ ఉన్న పోలీసు సిబ్బంది వైపు విసిరారని, అనంతరం అర్ధనగ్న స్థితిలో మహిళా పోలీసుల ఎదుట నిలబడ్డారని ఫిర్యాదులో ఆరోపించారు.

ఆయనను అనుసరించి మరికొందరు నాయకులు కూడా తమ టీషర్టులను తొలగించారని, మహిళా సిబ్బందికి అత్యంత సమీపంలో అర్ధనగ్నంగా నిలబడటంతో తాము తీవ్ర అసౌకర్యానికి, భయాందోళనలకు గురైనట్లు మహిళా కానిస్టేబుల్ పేర్కొన్నారు. ఎమ్మెల్సీ నవీన్ కుమార్ రెడ్డి కూడా దూకుడుగా వ్యవహరిస్తూ మహిళా పోలీసులపై గట్టిగా కేకలు వేశారని ఆరోపించారు.

ఈ ఘటనలో మహిళా సిబ్బంది పట్ల ఉద్దేశపూర్వకంగా అసభ్యకరంగా ప్రవర్తించి, వారి గౌరవానికి భంగం కలిగించే ప్రయత్నం చేశారని ఫిర్యాదుదారు పేర్కొన్నారు. తాము మహిళా పోలీసులు, విధుల్లో ఉన్న సిబ్బంది కావడంతో అక్కడి నుంచి వెళ్లిపోయే పరిస్థితి కూడా లేదని, ఈ పరిస్థితిని ఆసరాగా చేసుకుని తమను మరింత ఇబ్బందికి గురిచేశారని ఆరోపించారు.

నాయకులు భద్రతా వలయాన్ని దాటి అసెంబ్లీ లోపలికి వెళ్లేందుకు ప్రయత్నించిన సమయంలో మహిళా పోలీసులను తోసుకుంటూ ముందుకు కదిలారని ఫిర్యాదులో పేర్కొన్నారు. ఈ తోపులాటలో మహిళా సిబ్బంది శరీరంలోని సున్నితమైన భాగాలపై బలంగా నొక్కినట్లు ఆమె ఆరోపించారు. ముఖ్యంగా తన ఛాతీ భాగంలో బలంగా నొక్కడం వల్ల తీవ్ర నొప్పి ఏర్పడిందని తెలిపారు.

ఈ ఘటనతో తాను తీవ్రంగా భయపడ్డానని, మహిళా సిబ్బంది శారీరకంగా, మానసికంగా ఇబ్బందులకు గురయ్యారని ఫిర్యాదులో వివరించారు. విధి నిర్వహణలో ఉన్న మహిళా పోలీసులపై బలప్రయోగం చేయడం, వారిని అవమానించడం, భయపెట్టడం ద్వారా భద్రతా విధులను అడ్డుకునే ప్రయత్నం జరిగిందని ఆమె ఆరోపించారు.

ఘటనకు సంబంధించిన దృశ్యాలు అక్కడ విధుల్లో ఉన్న మీడియా ప్రతినిధుల కెమెరాల్లో నమోదయ్యాయని ఫిర్యాదులో పేర్కొన్నారు. మహిళా పోలీసుల ముఖాల్లో కనిపించిన భయం, అసౌకర్యం కూడా వీడియో దృశ్యాల్లో స్పష్టంగా కనిపిస్తాయని తెలిపారు. టీషర్టులు తొలగించడం, దుర్భాషలాడటం, మహిళా సిబ్బంది వైపు దూసుకురావడం వంటి చర్యలు తమపై శారీరక, మానసిక వేధింపులకు దారితీశాయని ఆరోపించారు.

తమపై జరిగిన ఘటన అనంతరం కుటుంబ సభ్యులు కూడా ఆందోళనకు గురయ్యారని మహిళా కానిస్టేబుల్ తెలిపారు. ఘటనకు సంబంధించిన దృశ్యాలు బయటకు రావడంతో తమ కుటుంబ సభ్యులు ప్రశ్నించారని, ఈ పరిస్థితి తమకు మరింత మానసిక వేదన కలిగించిందని ఫిర్యాదులో పేర్కొన్నారు.

ఇదే సమయంలో తమను ఉద్దేశించి భవిష్యత్తులో అధికారంలోకి వచ్చిన తర్వాత పరిణామాలు తీవ్రంగా ఉంటాయనే రీతిలో నాయకులు హెచ్చరికలు చేశారని కూడా ఆమె ఆరోపించారు. ఫిర్యాదు చేస్తే ఇబ్బందులు ఎదుర్కోవాల్సి వస్తుందనే భయాన్ని కలిగించేలా వ్యవహరించారని పేర్కొన్నారు.

ఈ ఘటనలో గాయపడిన మహిళా ఎస్‌ఐ, మహిళా కానిస్టేబుళ్లు వైద్య చికిత్స తీసుకోవాల్సి వచ్చిందని ఫిర్యాదులో తెలిపారు. తన ఛాతీ భాగంలో ఘటన అనంతరం కూడా తీవ్రమైన నొప్పి కొనసాగిందని పేర్కొన్నారు. ఘటనకు సంబంధించిన ఫొటోలు, వీడియో దృశ్యాల తెరచిత్రాలను ఆధారాలుగా ఫిర్యాదుతో పాటు సమర్పించినట్లు తెలిపారు.

మహిళా పోలీసుల విధులకు ఆటంకం కలిగించడం, వారిపై బలప్రయోగం చేయడం, అసభ్యకరంగా ప్రవర్తించడం, బెదిరింపులకు పాల్పడడం వంటి ఆరోపణలపై సంబంధిత నాయకులపై చట్టప్రకారం చర్యలు తీసుకోవాలని ఆమె పోలీసులను కోరారు.

మహిళా కానిస్టేబుల్ ఫిర్యాదులో పేర్కొన్న ఆరోపణల ఆధారంగా పోలీసులు కేసు నమోదు చేసి దర్యాప్తు చేపట్టినట్లు సమాచారం. ఘటనకు సంబంధించిన వీడియోలు, ఫొటోలు, ఇతర ఆధారాలను పరిశీలించిన అనంతరం ఆరోపణలపై వాస్తవాలను పోలీసులు నిర్ధారించాల్సి ఉంది.