చెరువు కట్ట ధ్వంసం చేసిన వారిపై చట్టపరమైన చర్యలు తీసుకోవాలి

ఏలూరు జిల్లా నూజివీడు నియోజకవర్గం ముసునూరు మండలం చింతలవల్లిలో నాగళ్ళ రామయ్య చెరువు కట్టను ధ్వంసం చేసిన వారిని గుర్తించి వారిపై చట్టపరమైన చర్యలు తీసుకోవడంతో పాటు, ధ్వంసమైన చెరువు కట్టను యథాతథంగా పునర్నిర్మించాలని సీపీఐ(ఎంఎల్) లిబరేషన్ పార్టీ మండల కార్యదర్శి వేముల బక్కయ్య డిమాండ్ చేశారు.

సీపీఐ(ఎంఎల్) లిబరేషన్ పార్టీ ఆధ్వర్యంలో బుధవారం చింతలవల్లి గ్రామస్తులతో కలిసి నాగళ్ళ రామయ్య చెరువును పరిశీలించారు. కొంతమంది భూకబ్జాదారులు చెరువు భూమిని ఆక్రమించుకునే ఉద్దేశంతో రాత్రి సమయంలో జేసీబీలతో చెరువు కట్టను ధ్వంసం చేశారని బక్కయ్య ఆరోపించారు. విషయం తెలుసుకున్న గ్రామస్తులు అడ్డుకుని అధికారులకు సమాచారం అందించారని తెలిపారు.

చెరువు పరిరక్షణ కోసం గ్రామస్తులు గత ఏడు నెలలుగా పోరాటం చేస్తున్నారని పేర్కొన్నారు. ఈ నేపథ్యంలో బుధవారం రెవెన్యూ, పోలీసు అధికారులు క్షేత్రస్థాయిలో నాగళ్ళ రామయ్య చెరువును పరిశీలించి సర్వే నిర్వహించారని తెలిపారు. రెవెన్యూ రికార్డుల ప్రకారం చెరువు ఉన్న ప్రదేశం, విస్తీర్ణం నిర్ధారణ అయినట్లు వెల్లడించారు.

సుమారు 200 సంవత్సరాలుగా పూర్వీకులు ఈ చెరువును నిర్మించి గ్రామ ప్రజలకు తాగునీరు, సాగునీటి అవసరాలు తీర్చడంతో పాటు పశువుల దాహార్తిని తీర్చేందుకు ఉపయోగపడేలా ఏర్పాటు చేశారని బక్కయ్య తెలిపారు. అలాంటి ప్రజా ప్రయోజనకరమైన చెరువు కట్టను ధ్వంసం చేయడం అన్యాయమని, ఇది బాధాకరమైన విషయమని అన్నారు.

చెరువు కట్టను ధ్వంసం చేసిన వారిని అధికారులు గుర్తించి చట్టపరమైన చర్యలు తీసుకోవాలని, కట్టను వెంటనే యథాతథంగా పునర్నిర్మించాలని డిమాండ్ చేశారు. చెరువు పూర్తిగా పునరుద్ధరించే వరకు గ్రామస్తులకు సీపీఐ(ఎంఎల్) లిబరేషన్ పార్టీ అండగా ఉంటుందని భరోసా ఇచ్చారు.

మండలంలోని చెరువులపై ఆక్రమణలు జరుగుతున్నప్పటికీ సంబంధిత అధికారుల పర్యవేక్షణ లోపించిందని బక్కయ్య విమర్శించారు. భవిష్యత్తులో చెరువులను ఆక్రమించేందుకు ప్రయత్నించే వారిపై చట్టపరమైన చర్యలు తీసుకుని, ప్రజా అవసరాలకు ఉపయోగపడే చెరువులను పరిరక్షించాలని కోరారు.

ఈ కార్యక్రమంలో పార్టీ జిల్లా కమిటీ సభ్యులు పల్లె పాము భవానితో పాటు చింతలవల్లి గ్రామస్తులు పాల్గొన్నారు.