ఎల్ఎన్‌జీ రైలుతో డీజిల్ వినియోగం 40 శాతం తగ్గింపు

న్యూఢిల్లీ: చెన్నైలోని ఇంటిగ్రల్ కోచ్ ఫ్యాక్టరీ (ఐసీఎఫ్) తయారు చేసిన ఎనిమిది కోచ్‌ల డీజిల్ ఎలక్ట్రిక్ మల్టిపుల్ యూనిట్ (డీఈఎంయూ) రైలును ఎల్ఎన్‌జీ ఇంధనంతో నడపనున్నట్లు రైల్వే శాఖ తెలిపింది.

సాబర్మతి–మెహ్‌సానా మార్గంలో ఈ రైలును నడపనున్నట్లు పేర్కొంది. ఎల్ఎన్‌జీ వినియోగం ద్వారా డీజిల్ వినియోగాన్ని సుమారు 40 శాతం వరకు తగ్గించవచ్చని రైల్వే శాఖ అంచనా వేస్తోంది.

ఈ రైలు నిర్వహణ ద్వారా ఏటా సుమారు రూ.23.9 లక్షల వరకు ఆదా అవుతుందని అంచనా వేస్తున్నారు. ఇంధన వ్యయాన్ని తగ్గించడంతో పాటు ప్రత్యామ్నాయ ఇంధన వినియోగాన్ని ప్రోత్సహించే చర్యల్లో భాగంగా ఈ రైలును వినియోగించనున్నట్లు రైల్వే శాఖ వెల్లడించింది.