మిత్రుడి కుటుంబానికి అండగా పదవ తరగతి బ్యాచ్
NTIDAY NEWS చిట్యాల
అకాల మరణం చెందిన తమ తోటి మిత్రుడి కుటుంబానికి పాత విద్యార్థులు అండగా నిలిచారు. పెద్దకాపర్తి గ్రామానికి చెందిన సిలువేరు వెంకటేష్ ఇటీవల ఆకస్మికంగా మరణించడంతో, అతని కుటుంబం ఆర్థిక ఇబ్బందుల్లో పడింది. ఈ విషయం తెలుసుకున్న అతని పాఠశాల మిత్రులు SSC 2006-2007 బ్యాచ్ స్పందించి తమ వంతు సాయాన్ని అందించారు.
సోమవారం నాడు బాధితుడి నివాసానికి చేరుకున్న మిత్ర బృందం, మృతుడి కుటుంబ సభ్యులను పరామర్శించి ధైర్యం చెప్పారు. అనంతరం అందరూ కలిసి పోగు చేసిన రూ. 56,000 నగదును ఆర్థిక సహాయం రూపంలో వెంకటేష్ కుటుంబానికి అందజేశారు. కష్టకాలంలో తమ తోటి మిత్రుడి కుటుంబాన్ని ఆదుకోవాలనే సంకల్పంతో ఈ నిధిని సేకరించినట్లు వారు తెలిపారు. ఈ కార్యక్రమంలో ఆవుల రాము యాదవ్, ఊట్కూరి రమేష్, మాచర్ల యాదగిరి, ఆవనగంటి ఆంజనేయులు, తోటకూర మహేష్, మైల వేణు, ఆవనగంటి గణేష్ తదితర మిత్రులు పాల్గొన్నారు.
