షార్ట్ సర్క్యూట్‌తో ఇంట్లో భారీ అగ్నిప్రమాదం

రూ.5 లక్షల నగదు, బంగారు నగలు, గృహోపకరణాలు దగ్ధం

ఏ.కొండూరు: మండలంలోని పోలిశెట్టిపాడు గ్రామంలో అర్థరాత్రి షార్ట్ సర్క్యూట్ కారణంగా ఓ ఇంట్లో భారీ అగ్నిప్రమాదం సంభవించింది. గ్రామానికి చెందిన కొమ్ము వెంకటేశ్వరరావు ఇంట్లో ఒక్కసారిగా మంటలు చెలరేగి, క్షణాల్లో ఇల్లంతా వ్యాపించాయి. ఈ ఘటనతో కుటుంబ సభ్యులు తీవ్ర భయాందోళనకు గురయ్యారు. మంటల తీవ్రతకు ఇంట్లో భద్రపరిచిన సుమారు రూ.5 లక్షల నగదు, బంగారు నగలు, విలువైన వస్తువులు, గృహోపకరణాలు పూర్తిగా దగ్ధమయ్యాయి. ప్రమాదంలో ఇంట్లోని సామగ్రి భారీగా కాలిపోయి బాధిత కుటుంబానికి తీవ్ర ఆస్తి నష్టం వాటిల్లింది. అర్థరాత్రి సమయంలో ఈ ఘటన చోటుచేసుకోవడంతో గ్రామంలో కలకలం రేగింది. అధికారులు ఘటనపై వివరాలు సేకరిస్తున్నారు.