ప్రీపెయిడ్ వినియోగదారులకు కొత్త రీఛార్జ్ ఆప్షన్లు

ప్రీపెయిడ్ వినియోగదారులకు కొత్త రీఛార్జ్ ఆప్షన్లు.. 30 రోజుల ప్లాన్లపై రాఘవ్ చద్దా

న్యూఢిల్లీ, Ntoday News, సెప్టెంబర్ 27: ప్రీపెయిడ్ మొబైల్ వినియోగదారులకు మరిన్ని రీఛార్జ్ ఆప్షన్లు అందుబాటులోకి రానున్నాయి. టెలికాం వినియోగదారుల రక్షణకు సంబంధించి టెలికాం రెగ్యులేటరీ అథారిటీ ఆఫ్ ఇండియా (TRAI) టెలికాం కన్స్యూమర్స్ ప్రొటెక్షన్ (13వ సవరణ) నిబంధనలు–2026ను సెప్టెంబర్ 22న విడుదల చేసింది.

కొత్త నిబంధనల ప్రకారం 30 రోజులు లేదా అంతకంటే తక్కువ కాలపరిమితి ఉన్న వాయిస్, ఎస్ఎంఎస్, డేటా బండిల్ ప్లాన్లకు అనుగుణంగా వాయిస్, ఎస్ఎంఎస్ మాత్రమే అందించే ప్రత్యేక టారిఫ్ వోచర్లు (STVs) కూడా అందుబాటులో ఉంచాల్సి ఉంటుంది. అలాగే ప్రతి నెలా అదే తేదీన పునరుద్ధరించుకునే అవకాశం ఉన్న వాయిస్–ఎస్ఎంఎస్ ప్లాన్‌ను కూడా అందించాల్సి ఉంటుంది.

ఈ మార్పులపై రాజ్యసభ సభ్యుడు రాఘవ్ చద్దా స్పందిస్తూ.. 28 రోజుల చెల్లుబాటు కలిగిన రీఛార్జ్‌ల కారణంగా ఏడాదిలో 13 సార్లు రీఛార్జ్ చేయాల్సి వస్తోందని తాను గతంలో పార్లమెంట్‌లో అంశాన్ని ప్రస్తావించానని తెలిపారు. 30 రోజుల చెల్లుబాటు కలిగిన ప్లాన్లు అందుబాటులోకి వస్తే ఏడాదిలో 13 సార్లకు బదులుగా 12 సార్లు రీఛార్జ్ చేసుకునే అవకాశం ఉంటుందని పేర్కొన్నారు.

డేటా అవసరం లేని వినియోగదారుల కోసం కేవలం వాయిస్ కాల్స్, ఎస్ఎంఎస్‌లతో కూడిన ప్లాన్లను అందుబాటులోకి తీసుకురావడం వల్ల తమ అవసరాలకు అనుగుణంగా రీఛార్జ్ చేసుకునే అవకాశం పెరుగుతుందని చద్దా తెలిపారు. తక్కువ బడ్జెట్‌తో ప్రధానంగా కాల్స్, ఎస్ఎంఎస్ సేవలను వినియోగించే వారికి ఈ మార్పులు ఉపయోగపడతాయని ఆయన పేర్కొన్నారు.

కొత్త నిబంధనలతో డేటా సేవలు అవసరం లేని వినియోగదారులకు వాయిస్, ఎస్ఎంఎస్ సేవల కోసం మరిన్ని ఎంపికలు లభించే అవకాశం ఉందని TRAI నిబంధనల ఉద్దేశ్యంపై వచ్చిన వివరణల్లో పేర్కొంది.