పెనుగొలను గ్రామంలో ఘనంగా ఉపాధ్యాయ దినోత్సవ వేడుకలు

ఉపాధ్యాయుల సేవలు చిరస్మరణీయం.. అంగన్వాడీ సిబ్బందికి సన్మానం

ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలను గ్రామంలో శనివారం పలుచోట్ల ఉపాధ్యాయ దినోత్సవ కార్యక్రమాలను ఘనంగా నిర్వహించారు. పాఠశాలలు, అంగన్వాడీ కేంద్రం, శాఖ గ్రంథాలయంలో ప్రత్యేక కార్యక్రమాలు నిర్వహించి ఉపాధ్యాయుల సేవలను కొనియాడారు.

కోట మార్కండేయ జిల్లా పరిషత్ ఉన్నత పాఠశాలలో..

పెనుగొలను కోట మార్కండేయ జిల్లా పరిషత్ ఉన్నత పాఠశాలలో డాక్టర్ సర్వేపల్లి రాధాకృష్ణన్ చిత్రపటానికి పూలమాలలు వేసి ఘనంగా నివాళులర్పించారు. అనంతరం నిర్వహించిన సభలో పాఠశాల ప్రధానోపాధ్యాయుడు ఎం. దుర్గాప్రసాద్ మాట్లాడుతూ.. సర్వేపల్లి రాధాకృష్ణన్ రాష్ట్రపతిగా బాధ్యతలు చేపట్టిన సందర్భంగా ఆయన పుట్టినరోజును జరపాలని విద్యార్థులు, మిత్రులు కోరారని తెలిపారు.

అయితే తన పుట్టినరోజును ప్రత్యేకంగా జరపడం కంటే, సెప్టెంబర్ 5వ తేదీని దేశంలోని ఉపాధ్యాయులందరి గౌరవార్థం ఉపాధ్యాయ దినోత్సవంగా నిర్వహిస్తే ఎంతో సంతోషిస్తానని రాధాకృష్ణన్ సూచించారని వివరించారు. అప్పటి నుంచి ప్రతి ఏడాది సెప్టెంబర్ 5న ఆయన జయంతిని పురస్కరించుకుని ఉపాధ్యాయ దినోత్సవాన్ని నిర్వహిస్తున్నట్లు తెలిపారు.

ఈ కార్యక్రమంలో పలువురు ఉపాధ్యాయులు, విద్యార్థులు పాల్గొన్నారు.

99వ అంగన్వాడీ కేంద్రంలో సిబ్బందికి సన్మానం

పెనుగొలను 99వ అంగన్వాడీ కేంద్రంలోనూ ఉపాధ్యాయ దినోత్సవ కార్యక్రమాన్ని నిర్వహించారు. డాక్టర్ సర్వేపల్లి రాధాకృష్ణన్ చిత్రపటానికి పూలమాలలు వేసి నివాళులర్పించారు.

ఈ సందర్భంగా శిరిడీ సాయిబాబా సేవా కమిటీ సభ్యులు అంగన్వాడీ ఉపాధ్యాయురాలు కే. లింగమ్మ, సహాయకురాలు దేవర రామాంజనమ్మ (అంజలి)ను నూతన వస్త్రాలతో సత్కరించారు. అనంతరం చిన్నారులకు మిఠాయిలు పంపిణీ చేశారు.

సాయిబాబా సేవా కమిటీ అధ్యక్షుడు వూటుకూరు నారాయణరావు మాట్లాడుతూ.. చిన్నారులకు మొదటి గురువు అంగన్వాడీ ఉపాధ్యాయురాలని అన్నారు. తల్లిదండ్రుల తర్వాత పిల్లలు బయట ప్రపంచంలోకి అడుగుపెట్టేది అంగన్వాడీ కేంద్రాల ద్వారానేనని తెలిపారు. చిన్నారుల భవిష్యత్తుకు పునాది వేయడంలో అంగన్వాడీ సిబ్బంది ఎంతో కీలకమైన పాత్ర పోషిస్తున్నారని కొనియాడారు.

ఈ కార్యక్రమంలో అంగన్వాడీ చిన్నారులు, తల్లిదండ్రులు, గ్రామస్తులు పాల్గొన్నారు.

శాఖ గ్రంథాలయంలోనూ వేడుకలు

పెనుగొలను శాఖ గ్రంథాలయంలో గ్రంథాలయ అధికారి తెనాలి వెంకటేశ్వర్లు ఆధ్వర్యంలో ఉపాధ్యాయ దినోత్సవ కార్యక్రమాన్ని ఘనంగా నిర్వహించారు. ఈ సందర్భంగా ఉపాధ్యాయుల సేవలను స్మరించుకున్నారు. కార్యక్రమంలో పలువురు విద్యార్థులు, గ్రామస్తులు పాల్గొన్నారు.