ప్రసవించిన అరగంటలోపే ముర్రుపాలు తప్పనిసరి – డా. శ్రీగిరీష

పీలేరు మండలం తలుపుల ప్రాథమిక ఆరోగ్య కేంద్రంలో ప్రపంచ తల్లిపాల వారోత్సవాల సందర్భంగా నిర్వహించిన అవగాహన కార్యక్రమంలో ప్రధాన వైద్యాధికారి డా. శ్రీగిరీష తల్లిపాల ప్రాముఖ్యతపై వివరించారు. ఆగస్టు 1 నుంచి 7 వరకు నిర్వహించే ప్రపంచ తల్లిపాల వారోత్సవాలను విజయవంతం చేయాలని క్షేత్రస్థాయి ఆరోగ్య సిబ్బందికి సూచించారు.

ప్రసవించిన అరగంటలోపే నవజాత శిశువుకు ముర్రుపాలు పట్టించడం అత్యంత కీలకమని ఆయన తెలిపారు. ముర్రుపాలు శిశువుకు తొలి రక్షణ కవచంగా పనిచేస్తాయని, రోగనిరోధక శక్తిని పెంచి అనేక అంటువ్యాధుల నుంచి కాపాడుతాయని వివరించారు.

జననం నుంచి తొలి ఆరు నెలల వరకు శిశువుకు తల్లిపాలు మాత్రమే ఇవ్వాలని, అవే సంపూర్ణ పౌష్టికాహారమని పేర్కొన్నారు. తల్లిపాలు శిశువు శారీరక ఎదుగుదలతో పాటు మెదడు అభివృద్ధి, మానసిక వికాసానికి కూడా ఎంతో దోహదపడతాయని చెప్పారు.

గ్రామీణ ప్రాంతాల్లో ప్రతి గర్భిణి, బాలింతకు ముర్రుపాల ప్రయోజనాలపై విస్తృతంగా అవగాహన కల్పించాలని ఆరోగ్య కార్యకర్తలకు సూచించారు. తల్లిపాలపై ఉన్న అపోహలను తొలగిస్తూ ప్రతి శిశువుకు జీవితంలోనే ఉత్తమ ఆరంభాన్ని అందించేందుకు కృషి చేయాలని పిలుపునిచ్చారు.