పశ్చిమ బెంగాల్‌లో దారుణం.. భార్య తల నరికి ఆలయంలో కూర్చున్న భర్త

పశ్చిమ బెంగాల్‌లోని దక్షిణ దినాజ్‌పూర్ జిల్లా గంగారాంపూర్‌లో ఒళ్లు గగుర్పొడిచే ఘటన చోటుచేసుకుంది. భార్యను హత్య చేయడమే కాకుండా ఆమె తలను నరికి, దానిని చేతిలో పట్టుకుని స్థానిక కాళీమాత ఆలయ ప్రాంగణంలో కూర్చున్న భర్త ఉదంతం స్థానికంగా తీవ్ర కలకలం రేపింది. వివరాల్లోకి వెళితే.. గంగారాంపూర్‌కు చెందిన రింటూ ఘోష్ (46)కు 15 ఏళ్ల క్రితం సీమా సర్కార్‌తో వివాహమైంది. ఈ దంపతులకు ఇద్దరు కుమారులు ఉన్నారు. రింటూ గతంలో బస్సు కండక్టర్‌గా పనిచేసేవాడు. అయితే కొంతకాలం క్రితం ఉద్యోగం మానేయడంతో కుటుంబంలో ఆర్థిక ఇబ్బందులు మొదలయ్యాయి. ఈ నేపథ్యంలో భార్యాభర్తల మధ్య తరచూ వివాదాలు జరుగుతున్నట్లు సమాచారం. ఈ క్రమంలో మరోసారి ఇద్దరి మధ్య గొడవ జరగడంతో ఆగ్రహానికి గురైన రింటూ భార్యను హత్య చేసి, ఆమె తలను వేరు చేసినట్లు సమాచారం. అనంతరం భార్య తలను తీసుకుని స్థానిక కాళీమాత ఆలయ ప్రాంగణానికి చేరుకుని అక్కడే కూర్చున్నాడు. ఈ ఘటనతో స్థానికులు తీవ్ర భయాందోళనకు గురయ్యారు. సమాచారం అందుకున్న పోలీసులు వెంటనే ఘటనా స్థలానికి చేరుకుని రింటూ ఘోష్‌ను అదుపులోకి తీసుకున్నారు. ఘటన జరిగిన సమయంలో ఇద్దరు పిల్లలు ఇంట్లోనే ఉన్నట్లు తెలుస్తోంది. మృతదేహాన్ని పోస్టుమార్టం నిమిత్తం ఆసుపత్రికి తరలించారు. భార్యాభర్తల మధ్య నెలకొన్న వివాదాలే హత్యకు కారణమని ప్రాథమిక దర్యాప్తులో పోలీసులు భావిస్తున్నారు. ఘటనకు సంబంధించి మరిన్ని వివరాలు తెలియాల్సి ఉంది.