పటేల్‌ సేవలు దేశానికి గర్వకారణం: వరంగల్‌ సీపీ ఎన్‌. శ్వేత
- పటేల్‌ ఆశయాలను స్ఫూర్తిగా తీసుకోవాలని పిలుపు
- జాతీయ ఐక్యతా దినోత్సవం సందర్భంగా పోలీస్‌ కమిషనరేట్‌లో నివాళులు
వరంగల్‌, అక్టోబర్‌ 31 (ఎన్‌ టుడే న్యూస్‌): సర్దార్‌ వల్లభాయ్‌ పటేల్‌ జయంతి, జాతీయ ఐక్యతా దినోత్సవం (ఏక్తా దివస్‌) సందర్భంగా వరంగల్‌ పోలీస్‌ కమిషనరేట్‌లో ప్రత్యేక కార్యక్రమం నిర్వహించారు. ఈ సందర్భంగా పోలీస్‌ కమిషనర్‌ ఎన్‌. శ్వేత, ఐపీఎస్‌ పటేల్‌ చిత్రపటానికి పూలమాల వేసి ఘనంగా నివాళులర్పించారు.
ఈ సందర్భంగా సీపీ ఎన్‌. శ్వేత మాట్లాడుతూ.. దేశ సమగ్రత, ఐక్యత కోసం సర్దార్‌ వల్లభాయ్‌ పటేల్‌ చేసిన సేవలు చిరస్మరణీయమని కొనియాడారు. ఆయన దేశానికి అందించిన సేవలు ప్రతి భారతీయుడికీ గర్వకారణమని పేర్కొన్నారు.
స్వాతంత్ర్యం అనంతరం సంస్థానాల విలీనంలో కీలక పాత్ర పోషించి, దేశ ఐక్యతకు పునాది వేసిన ఉక్కుమనిషి పటేల్‌ ఆశయాలను ప్రతి ఒక్కరూ స్ఫూర్తిగా తీసుకోవాలని పిలుపునిచ్చారు.
ఈ కార్యక్రమంలో సెంట్రల్‌ జోన్‌ డీసీపీ దార కవిత, అడిషనల్‌ డీసీపీ (పరిపాలన) రాయల ప్రభాకర్‌రావు, ఏసీపీలు మధుసూదన్‌, జానీ నరసింహులు, ఏఆర్‌ అదనపు డీసీపీలు సురేష్‌, శ్రీనివాస్‌, ఏఆర్‌ విభాగానికి చెందిన ఆర్‌ఐలు, ఆర్‌ఎస్‌ఐలు, ఇతర పోలీసు సిబ్బంది పాల్గొన్నారు.
