పానుగళ్ళ కోటేశ్వరరావు కుటుంబానికి అట్లూరి రమేష్ పరామర్శ

ఆరుగొలనుపేటలో సీతామహాలక్ష్మి చిత్రపటానికి నివాళులు

ఏలూరు జిల్లా, నూజివీడు నియోజకవర్గం, చాట్రాయి మండలం ఆరుగొలనుపేట గ్రామంలో ఇటీవల మృతి చెందిన టీడీపీ గ్రామ పార్టీ అధ్యక్షుడు పానుగళ్ళ కోటేశ్వరరావు సతీమణి పానుగళ్ళ సీతామహాలక్ష్మి కుటుంబాన్ని టీడీపీ సీనియర్ నేత అట్లూరి రమేష్ పరామర్శించారు. శనివారం మృతురాలి నివాసానికి వెళ్లిన ఆయన కుటుంబ సభ్యులను కలిసి వారి దుఃఖంలో పాలుపంచుకున్నారు. సీతామహాలక్ష్మి చిత్రపటానికి పూలమాలలు వేసి ఘనంగా నివాళులర్పించారు. అనంతరం కుటుంబ సభ్యులకు ధైర్యం చెబుతూ ప్రగాఢ సానుభూతి తెలిపారు. ఈ సందర్భంగా అట్లూరి రమేష్ మాట్లాడుతూ, సీతామహాలక్ష్మి మృతి ఆ కుటుంబానికి తీరని లోటని పేర్కొన్నారు. ఆప్తులను కోల్పోయిన సమయంలో కుటుంబ సభ్యులు ధైర్యంగా ఉండాలని, మృతురాలి ఆత్మకు శాంతి చేకూరాలని ఆకాంక్షించారు. బాధలో ఉన్న కుటుంబానికి అండగా ఉంటామని భరోసా ఇచ్చారు. ఈ కార్యక్రమంలో స్థానిక టీడీపీ నాయకులు, కార్యకర్తలు పాల్గొని సీతామహాలక్ష్మికి నివాళులర్పించారు.