Madanapalle: మదనపల్లెలో ఎస్పీ ఆధ్వర్యంలో పోలీసు అమరవీరులకు నివాళిగా కొవ్వొత్తుల ర్యాలీ
- అమరవీరుల త్యాగస్ఫూర్తి సమాజానికి ఆదర్శం: ఎస్పీ ధీరజ్‌ కునుబిల్లి
- వందలాది మంది విద్యార్థులు, పోలీసు సిబ్బంది భాగస్వామ్యం
అన్నమయ్య జిల్లా, మదనపల్లె, అక్టోబర్‌ 31 (ఎన్‌ టుడే న్యూస్‌):
శాంతిభద్రతల పరిరక్షణతో పాటు సమాజ రక్షణ కోసం విధి నిర్వహణలో ప్రాణాలను అర్పించిన పోలీసు అమరవీరుల త్యాగాలు వెలకట్టలేనివని అన్నమయ్య జిల్లా ఎస్పీ ధీరజ్‌ కునుబిల్లి, ఐపీఎస్‌ అన్నారు. పోలీసు అమరవీరుల సంస్మరణ వారోత్సవాల ముగింపు సందర్భంగా శనివారం సాయంత్రం మదనపల్లె పట్టణంలో జిల్లా పోలీసు యంత్రాంగం, వివిధ కళాశాలల విద్యార్థుల ఆధ్వర్యంలో భారీ కొవ్వొత్తుల ర్యాలీ నిర్వహించి అమరవీరులకు ఘనంగా నివాళులర్పించారు.
మదనపల్లె రెండో పట్టణ పోలీస్‌ స్టేషన్‌ వద్ద ప్రారంభమైన ఈ ర్యాలీలో పోలీసు అధికారులు, సిబ్బంది, వందలాది మంది విద్యార్థినీ విద్యార్థులు కొవ్వొత్తులు చేతబట్టి పాల్గొన్నారు. అక్కడి నుంచి గొల్లపల్లి సర్కిల్‌, ఎస్‌బీఐ కాలనీ మీదుగా ర్యాలీ కొనసాగి డాక్టర్‌ బి.ఆర్‌. అంబేద్కర్‌ సర్కిల్‌కు చేరుకుంది. అక్కడ కొవ్వొత్తులు వెలిగించి మానవహారంగా ఏర్పడి అమరవీరుల త్యాగాలను స్మరించుకుంటూ రెండు నిమిషాలు మౌనం పాటించి శ్రద్ధాంజలి ఘటించారు.
ఈ సందర్భంగా ఎస్పీ ధీరజ్‌ కునుబిల్లి మాట్లాడుతూ ప్రజల ధన, మాన, ప్రాణాల రక్షణ కోసం దేశవ్యాప్తంగా ఈ ఏడాది విధి నిర్వహణలో ప్రాణత్యాగం చేసిన పోలీసు వీరుల సేవలను స్మరించుకోవడం ప్రతి ఒక్కరి బాధ్యత అని పేర్కొన్నారు. వారి త్యాగస్ఫూర్తి ప్రతి పోలీసు అధికారికి, సమాజంలోని ప్రతి ఒక్కరికీ ఆదర్శప్రాయమని కొనియాడారు.
అక్టోబర్‌ 21న ప్రారంభమైన పోలీసు అమరవీరుల సంస్మరణ వారోత్సవాలను జిల్లావ్యాప్తంగా విజయవంతంగా నిర్వహించినట్లు ఎస్పీ తెలిపారు. వారోత్సవాల్లో భాగంగా పాఠశాలలు, కళాశాలల విద్యార్థులకు వ్యాసరచన, వక్తృత్వ పోటీలు, ఉచిత వైద్య శిబిరాలు, రక్తదాన శిబిరాలు నిర్వహించినట్లు వివరించారు. పోలీసుల విధులు, పనితీరుపై విద్యార్థులకు అవగాహన కల్పించేందుకు 'ఓపెన్‌ హౌస్‌' కార్యక్రమాలను కూడా నిర్వహించినట్లు వెల్లడించారు.
ఈ కార్యక్రమంలో జిల్లా అదనపు ఎస్పీ (అడ్మిన్‌) ఎం. వెంకటాద్రి, మదనపల్లె డీఎస్పీ బి. ప్రసాద్‌, పట్టణ, రూరల్‌ సీఐలు, ఆర్‌ఐలు, ఎస్‌ఐలు, ఆర్‌ఎస్‌ఐలు, సివిల్‌, ఏఆర్‌ పోలీసు సిబ్బంది, ప్రత్యేక పోలీసు బలగాలు, వివిధ కళాశాలల అధ్యాపకులు, విద్యార్థినీ విద్యార్థులు పాల్గొన్నారు.
