అక్టోబర్ 1 మధ్యాహ్నం నుంచి పింఛన్ల పంపిణీ

అక్టోబర్ 1 మధ్యాహ్నం నుంచి పింఛన్ల పంపిణీ ఏలూరు జిల్లా కలెక్టర్ కె.వెట్రిసెల్వి

ఏలూరు జిల్లాలో అక్టోబర్ నెలకు సంబంధించిన ఎన్టీఆర్ భరోసా పింఛన్ల పంపిణీ అక్టోబర్ 1వ తేదీ మధ్యాహ్నం నుంచి ప్రారంభం కానుంది. ఈ మేరకు జిల్లా కలెక్టర్ కె.వెట్రిసెల్వి గురువారం మునిసిపల్ కమిషనర్లు, ఎంపీడీఓలతో నిర్వహించిన జూమ్ సమావేశంలో వివరాలు వెల్లడించారు.

జాతీయ బ్యాంకు ఉద్యోగులు సెప్టెంబర్ 28 నుంచి 30వ తేదీ వరకు సమ్మెలో పాల్గొంటున్న నేపథ్యంలో అక్టోబర్ 1వ తేదీ ఉదయం బ్యాంకుల నుంచి నగదు ఉపసంహరించి, అదే రోజు మధ్యాహ్నం నుంచి లబ్ధిదారులకు పింఛన్లు పంపిణీ చేయనున్నట్లు తెలిపారు. అక్టోబర్ 1వ తేదీన పింఛను తీసుకోలేని వారికి అక్టోబర్ 3వ తేదీన పింఛను అందజేస్తామని కలెక్టర్ వెల్లడించారు.

సచివాలయ సిబ్బంది, ఇతర ప్రభుత్వ సిబ్బంది ద్వారా లబ్ధిదారుల ఇళ్ల వద్దకే వెళ్లి పింఛన్లు పంపిణీ చేసేందుకు అన్ని ఏర్పాట్లు పూర్తి చేసినట్లు తెలిపారు. పింఛనుదారులు పింఛను పంపిణీ సమయంలో ఇళ్ల వద్ద అందుబాటులో ఉండాలని కలెక్టర్ సూచించారు.

ఈ సమీక్షా సమావేశంలో డీఆర్డీఏ పీడీ టి.విజయలక్ష్మి, డీపీఓ మల్లికార్జునరావు, మునిసిపల్ కమిషనర్లు, ఎంపీడీఓలు, ఇతర అధికారులు పాల్గొన్నారు.