రాష్ట్ర హాకీ ఛాంపియన్‌గా నల్లగొండ జిల్లా జట్టు!

హైదరాబాద్‌ గచ్చిబౌలిలో జరిగిన రాష్ట్ర స్థాయి హాకీ టోర్నమెంట్‌లో నల్లగొండ జిల్లా యువ హాకీ జట్టు అద్భుత ప్రదర్శనతో విజేతగా నిలిచింది. ఉత్కంఠభరితంగా జరిగిన ఫైనల్స్‌లో నల్లగొండ జట్టు 2–0 స్కోరుతో హైదరాబాద్‌ను మట్టికరిపించి ట్రోఫీని కైవసం చేసుకుంది. సెమీస్‌లో నిజామాబాద్‌పై 5–0తో ఘన విజయం సాధించింది. టోర్నీ పొడవునా తిరుగులేని ఆధిపత్యం ప్రదర్శించిన నల్లగొండ జట్టు  వరంగల్, ఆదిలాబాద్, మహబూబ్‌నగర్ జట్లపై వరుస విజయాలు సాధించింది. ముఖ్యంగా ఖమ్మం జట్టుపై 10–0 తేడాతో భారీ విజయాన్ని నమోదు చేసింది.bవిజేతగా నిలిచిన నల్లగొండ జట్టుకు తెలంగాణ ప్రభుత్వ సలహాదారుడు జితేందర్ రెడ్డి చేతుల మీదుగా ట్రోఫీని అందజేశారు. ​ఈ ఘన విజయంపై నల్లగొండ జిల్లా హాకీ అసోసియేషన్ అధ్యక్షుడు శ్రీనివాస్ రెడ్డి, ప్రధాన కార్యదర్శి ఎం.డి. ఇమామ్ కరీం హర్షం వ్యక్తం చేశారు. జట్టు క్రీడాకారులను, కోచ్‌లను, మేనేజర్‌ను ప్రత్యేకంగా అభినందించిన వారు.. భవిష్యత్తులో రాష్ట్ర, జాతీయ స్థాయిలో జట్టు మరిన్ని విజయాలు సాధించాలని ఆకాంక్షించారు.