వరల్డ్ బ్యాంక్ ప్రతినిధులతో కుడా అభివృద్ధి పనులపై సమీక్ష
హనుమకొండ, సెప్టెంబర్ 17, NTODAY న్యూస్: వరంగల్, కాకతీయ పట్టణాభివృద్ధి సంస్థ (కుడా) పరిధిలో చేపట్టనున్న వివిధ అభివృద్ధి కార్యక్రమాలపై వరల్డ్ బ్యాంక్ ప్రతినిధులతో గురువారం సమీక్షా సమావేశం నిర్వహించారు. కుడా కార్యాలయంలోని మినీ సమావేశ మందిరంలో కుడా చైర్‌పర్సన్ గుండు సుధారాణి ఆధ్వర్యంలో జరిగిన ఈ సమావేశంలో వరంగల్ పార్లమెంట్ సభ్యురాలు డాక్టర్ కడియం కావ్య, స్థానిక ఎమ్మెల్యే నాయిని రాజేందర్ రెడ్డి పాల్గొన్నారు.
కుడా పరిధిలో పట్టణ మౌలిక వసతుల అభివృద్ధి, ప్రజలకు మెరుగైన సౌకర్యాల కల్పన, భవిష్యత్ అవసరాలకు అనుగుణంగా చేపట్టాల్సిన ప్రాజెక్టులపై సమావేశంలో ప్రధానంగా చర్చించారు. వరల్డ్ బ్యాంక్ సహకారంతో చేపట్టే అభివృద్ధి కార్యక్రమాల రూపకల్పన, ప్రాజెక్టులకు ప్రాధాన్యత క్రమం, అమలు విధానం తదితర అంశాలపై ప్రజాప్రతినిధులు, అధికారులు, వరల్డ్ బ్యాంక్ ప్రతినిధులు అభిప్రాయాలను పంచుకున్నారు.
ఈ సందర్భంగా ఎంపీ డాక్టర్ కడియం కావ్య మాట్లాడుతూ వరంగల్ నగరంతో పాటు కుడా పరిధిలోని ప్రాంతాల సమగ్ర అభివృద్ధికి అవసరమైన మౌలిక వసతుల కల్పనకు ప్రాధాన్యత ఇవ్వాల్సిన అవసరం ఉందని సూచించారు. పెరుగుతున్న పట్టణీకరణ, భవిష్యత్ అవసరాలను దృష్టిలో ఉంచుకుని దీర్ఘకాలిక ప్రయోజనాలు కలిగేలా అభివృద్ధి ప్రాజెక్టులను రూపొందించాలని పేర్కొన్నారు.
వరల్డ్ బ్యాంక్ సహకారంతో చేపట్టే ప్రాజెక్టుల ద్వారా పట్టణ ప్రాంతాల్లో మౌలిక వసతులు మరింత మెరుగుపడేలా కార్యాచరణ రూపొందించాల్సిన అవసరంపై సమావేశంలో చర్చ జరిగినట్లు అధికారులు తెలిపారు.
సమావేశంలో కుడా వైస్ చైర్‌పర్సన్, హనుమకొండ జిల్లా కలెక్టర్ చాహత్ బాజ్‌పాయ్, వరంగల్ జిల్లా కలెక్టర్ డాక్టర్ సత్యశారద, బల్దియా కమిషనర్ టి. వెంకన్న, సీపీఓ అజిత్ రెడ్డి, ఈఈ భీమ్‌రావు, వరల్డ్ బ్యాంక్ ప్రతినిధులు బయానా, నేహా వ్యాస్, అపూర్వ తదితరులు పాల్గొన్నారు.
