సుచిత్ర సెంటర్‌లో రోడ్డు ప్రమాదం.. భర్త మృతి
హైదరాబాద్: సుచిత్ర సెంటర్‌ సమీపంలోని సౌత్‌ ఇండియా షాపింగ్‌ మాల్‌ యూటర్న్‌ వద్ద జరిగిన రోడ్డు ప్రమాదంలో ఓ వ్యక్తి మృతి చెందగా, ఆయన భార్య తీవ్రంగా గాయపడ్డారు.
పోలీసుల వివరాల ప్రకారం.. టీఎన్‌ఆర్‌ మాల్‌లో సినిమా చూసి దంపతులు బైక్‌పై కొంపల్లికి వెళ్తుండగా, వెనుక నుంచి వేగంగా వచ్చిన కారు వారి బైక్‌ను ఢీకొట్టింది. ఈ ప్రమాదంలో దంపతులు తీవ్రంగా గాయపడ్డారు.
గాయపడిన వారిని ఆస్పత్రికి తరలించి చికిత్స అందించగా.. చికిత్స పొందుతూ భర్త అర్జున్‌ సర్దా (38) మృతి చెందారు. ఆయన భార్య గుర్జన్‌ సర్దా (34) పరిస్థితి విషమంగా ఉన్నట్లు సమాచారం.
ప్రమాదం అనంతరం కారు అక్కడే వదిలి డ్రైవర్‌ పరారైనట్లు పోలీసులు తెలిపారు. కారు పోలీసుల ఆధీనంలో ఉన్నప్పటికీ డ్రైవర్‌ను ఇంకా అరెస్ట్‌ చేయలేదని బాధిత కుటుంబ సభ్యులు ఆవేదన వ్యక్తం చేశారు. డ్రైవర్‌ను గుర్తించి చట్టపరమైన చర్యలు తీసుకుని తమకు న్యాయం చేయాలని పోలీసులను కోరారు.
ఈ ఘటనపై పేట్‌ బషీరాబాద్‌ పోలీసులు కేసు నమోదు చేసి దర్యాప్తు చేపట్టారు. ప్రమాదానికి గల పూర్తి కారణాలు, డ్రైవర్‌ ఆచూకీపై పోలీసులు వివరాలు సేకరిస్తున్నారు.
