హౌతీలతో కాల్పుల విరమణకు సౌదీ భారీ ఆర్థిక ప్రతిపాదన?
- పాక్‌ మధ్యవర్తిత్వంపై చర్చ
- హౌతీలతో చర్చల్లో పాక్‌ ఆర్మీ చీఫ్‌ మునీర్‌
- మక్కా రక్షణ ఒప్పందంపై ప్రశ్నలు
- ఇరాన్‌ మధ్యవర్తిత్వంతో చర్చలు
రియాద్‌ | ఎన్ టుడే న్యూస్‌: సౌదీ అరేబియాపై హౌతీ తిరుగుబాటుదారుల దాడులు కొనసాగుతున్న నేపథ్యంలో పాకిస్థాన్‌, తుర్కియేతో కుదుర్చుకున్న మక్కా ఉమ్మడి రక్షణ ఒప్పందంపై చర్చ మొదలైంది. దాడులను అడ్డుకోవడంలో మిత్రదేశాల సైనిక సహకారం పరిమితంగా ఉందన్న విమర్శలు వినిపిస్తున్నాయి.
సౌదీ అరేబియాపై దాడులు నిలిపివేసి కాల్పుల విరమణకు అంగీకరిస్తే హౌతీలకు 1 బిలియన్‌ డాలర్ల ఆర్థిక సహాయం అందించే ప్రతిపాదనపై చర్చలు జరుగుతున్నట్లు అంతర్జాతీయ మీడియా కథనాలు వెల్లడించాయి. ఈ చర్చల్లో పాకిస్థాన్‌ ఆర్మీ చీఫ్‌ ఫీల్డ్‌ మార్షల్‌ అసిమ్‌ మునీర్‌, తుర్కియే ప్రతినిధులు, ఇరాన్‌ అధికారులు పాల్గొన్నట్లు సమాచారం. అయితే, ఈ మొత్తం చెల్లింపుపై సౌదీ ప్రభుత్వం అధికారికంగా ధ్రువీకరించలేదు.
సౌదీ అరేబియా, పాకిస్థాన్‌, తుర్కియే మధ్య కుదిరిన మక్కా ఉమ్మడి రక్షణ ఒప్పందం ప్రకారం, ఒక దేశంపై సాయుధ దాడి జరిగితే దాన్ని మూడు దేశాలపై దాడిగా పరిగణించే నిబంధన ఉంది. సైనిక సహకారం, ఆయుధాల ఉత్పత్తి, సాంకేతిక పరిజ్ఞాన బదిలీ, నిఘా సమాచార మార్పిడి కూడా ఒప్పందంలో భాగంగా ఉన్నాయి. అయినప్పటికీ, హౌతీల దాడుల నేపథ్యంలో మిత్రదేశాల నుంచి అందుతున్న సహకారంపై ప్రశ్నలు తలెత్తుతున్నాయి.
హౌతీలకు ఇరాన్‌ మద్దతు ఉన్న నేపథ్యంలో, సౌదీ అరేబియా–హౌతీల మధ్య ఉద్రిక్తతలను తగ్గించేందుకు ఇరాన్‌లో ఉన్నతస్థాయి చర్చలు జరిగాయి. ఈ ప్రయత్నాలు కాల్పుల విరమణకు దారితీస్తాయా, సౌదీపై దాడులు ఆగుతాయా అన్నది స్పష్టత రావాల్సి ఉంది. ప్రస్తుతం 1 బిలియన్‌ డాలర్ల ప్రతిపాదన, దాని నిబంధనలు, హౌతీల అంగీకారంపై పూర్తి ధ్రువీకరణ లేదు.
