అబుదాబి విమానాశ్రయంలో తెలంగాణ మహిళ మృతి
షాద్‌నగర్‌ | ఎన్ టుడే న్యూస్‌:
తెలంగాణలోని రంగారెడ్డి జిల్లా షాద్‌నగర్‌ పారడైజ్‌ కాలనీకి చెందిన రజియా బేగం ఉమ్రా యాత్ర ముగించుకుని స్వదేశానికి తిరిగి వస్తుండగా అబుదాబి విమానాశ్రయంలో మృతి చెందారు. ఈ ఘటనతో ఆమె కుటుంబ సభ్యులు, బంధువులు విషాదంలో మునిగిపోయారు.
రజియా బేగం జెడ్డా నుంచి ఎతిహాద్‌ ఎయిర్‌వేస్‌కు చెందిన EY-616 విమానంలో అబుదాబి చేరుకున్నారు. అక్కడి నుంచి కనెక్టింగ్‌ విమానంలో హైదరాబాద్‌కు రావాల్సి ఉండగా, అంతలోనే ఆమె మృతి చెందినట్లు సమాచారం.
రజియా బేగం మృతదేహాన్ని వీలైనంత త్వరగా హైదరాబాద్‌కు తరలించేందుకు కేంద్ర విదేశాంగ మంత్రి ఎస్‌. జైశంకర్‌ జోక్యం చేసుకోవాలని విజ్ఞప్తి చేశారు. అబుదాబిలోని భారత రాయబార కార్యాలయం వెంటనే స్పందించి, అవసరమైన అధికారిక ప్రక్రియను వేగంగా పూర్తి చేసేందుకు సహకరించాలని కోరారు.
మృతదేహాన్ని స్వదేశానికి తీసుకురావడానికి అవసరమైన ఏర్పాట్లు త్వరగా పూర్తయ్యేలా సంబంధిత అధికారులు చర్యలు తీసుకోవాలని కుటుంబ సభ్యులు ఆశిస్తున్నారు.
