తల్లికి వందనం పథకంలో సైబర్ మోసం.. 28 మంది ఖాతాల నుంచి నగదు మాయం

తల్లికి వందనం పథకంలో సైబర్ మోసం.. 28 మంది ఖాతాల నుంచి నగదు మాయం

కర్నూలు, జూలై 29: తల్లికి వందనం పథకం పేరుతో కర్నూలు జిల్లాలో సైబర్ మోసం వెలుగుచూసింది. ఎయిర్‌టెల్ సిమ్‌లు విక్రయించే కొందరు సేల్స్ పర్సన్లు 28 మంది లబ్ధిదారుల ఖాతాల్లోని నగదును అక్రమంగా కాజేసినట్లు ఆరోపణలు వెలువడ్డాయి.

సిమ్‌లు విక్రయించే సమయంలో బాధితుల ఆధార్ వివరాలు సేకరించిన నిందితులు, అనంతరం వారి వేలిముద్రలు, బ్యాంకు ఖాతా వివరాలను దుర్వినియోగం చేసి ఖాతాల్లోని నగదును మాయం చేసినట్లు ప్రాథమిక విచారణలో వెల్లడైంది.

ఈ ఘటనపై బాధితుల ఫిర్యాదుతో పోలీసులు కేసు నమోదు చేసి దర్యాప్తు ప్రారంభించారు. నిందితుల పాత్ర, మోసం జరిగిన తీరు, బాధితుల సంఖ్యపై పూర్తి వివరాలను సేకరిస్తున్నారు. అధికారులు ప్రజలు తమ ఆధార్, బ్యాంకు వివరాలు, బయోమెట్రిక్ సమాచారాన్ని అపరిచితులకు ఇవ్వొద్దని సూచిస్తున్నారు.