చేవెళ్లలో ఏసీబీ వలలో ఇద్దరు ట్రెజరీ అధికారులు.. ప్రైవేట్ వ్యక్తి కూడా అరెస్ట్

రంగారెడ్డి జిల్లా: చేవెళ్ల సబ్‌ ట్రెజరీ కార్యాలయంలో లంచం డిమాండ్ చేసి స్వీకరించిన కేసులో ఇద్దరు ట్రెజరీ అధికారులు, ఓ ప్రైవేట్ వ్యక్తిని ఏసీబీ అధికారులు పట్టుకున్నారు. ఈ మేరకు ఏసీబీ 17 సెప్టెంబర్ 2026న విడుదల చేసిన ప్రెస్‌నోట్‌లో వివరాలు వెల్లడించింది.

ఏసీబీ వివరాల ప్రకారం.. చేవెళ్ల డివిజనల్ సబ్‌ ట్రెజరీ కార్యాలయంలో సబ్‌ ట్రెజరీ అధికారి మాడిగ లక్ష్మయ్య (AO-1), అసిస్టెంట్ ట్రెజరీ అధికారి కావలి అనురాధ (AO-2) ఫిర్యాదుదారుడి నుంచి రూ.2.50 లక్షల లంచం డిమాండ్ చేసినట్లు ఆరోపణలు ఉన్నాయి. ఇందులో భాగంగా రూ.1 లక్షను విడతగా స్వీకరించిన సమయంలో రంగారెడ్డి రేంజ్ ఏసీబీ అధికారులు దాడి చేసి పట్టుకున్నారు.

ఏసీబీ ప్రకారం.. రూ.1 లక్షలో రూ.50 వేల మొత్తాన్ని లక్ష్మయ్య తన వాటాగా ఫిర్యాదుదారుడి నుంచి స్వీకరించినట్లు పేర్కొంది. మరో రూ.50 వేల మొత్తాన్ని అనురాధ సూచనల మేరకు ప్రైవేట్ వ్యక్తి వడ్డె జంగయ్య అలియాస్ చిన్నా స్వీకరించినట్లు ఏసీబీ తెలిపింది.

ఫిర్యాదుదారుడి సస్పెన్షన్ కాలానికి సంబంధించిన రూ.23,25,390 జీతం బిల్లులు, పదవీ విరమణ అనంతర పెన్షన్ సర్దుబాటు బకాయిలు రూ.4,29,000కు సంబంధించిన బిల్లులను ప్రాసెస్ చేసి ముందుకు పంపినందుకు ప్రతిఫలంగా లంచం డిమాండ్ చేసినట్లు ఏసీబీ పేర్కొంది.

ఏసీబీ అధికారులు స్వాధీనం చేసుకున్న రూ.1 లక్షల లంచం మొత్తాన్ని AO-1, A-3 వద్ద నుంచి వారి సూచనల మేరకు రికవరీ చేసినట్లు ప్రెస్‌నోట్‌లో వెల్లడించారు. అధికారులు విధులను సక్రమంగా నిర్వహించకుండా అనుచిత ప్రయోజనం పొందేందుకు ప్రయత్నించినట్లు ఏసీబీ ఆరోపించింది.

నిందితులు AO-1 మాడిగ లక్ష్మయ్య, AO-2 కావలి అనురాధ, A-3 వడ్డె జంగయ్య అలియాస్ చిన్నాను నాంపల్లిలోని SPE & ACB కేసుల ప్రత్యేక కోర్టు ప్రిన్సిపల్ స్పెషల్ జడ్జి ఎదుట హాజరుపరచనున్నట్లు ఏసీబీ తెలిపింది. కేసు దర్యాప్తు కొనసాగుతోందని వెల్లడించింది.

ఫిర్యాదుదారుడి భద్రతా కారణాల దృష్ట్యా ఆయన వివరాలను ఏసీబీ వెల్లడించలేదు.