వివాహేతర సంబంధం ఇద్దరి ప్రాణాలు బలి భర్తతో గొడవల నేపథ్యంలో ప్రియుడితో కలిసి రైలు కింద దూకిన వివాహిత

 మండ్య: వివాహేతర సంబంధం చివరకు ఇద్దరి ప్రాణాలను బలిగొంది. భర్తతో ఏర్పడిన విభేదాలు, కుటుంబ కలహాల నేపథ్యంలో ఓ వివాహిత తన ప్రియుడితో కలిసి రైలు కిందపడి ఆత్మహత్య చేసుకున్న విషాద ఘటన కర్ణాటక రాష్ట్రంలోని మండ్య తాలూకా ఇండువాల్‌ సమీపంలో చోటుచేసుకుంది. మండ్య తాలూకా గున్నైకనహళ్లి గ్రామానికి చెందిన సహాన (27) బెంగళూరులోని ఓ ప్రైవేటు సంస్థలో పనిచేసేది. ఈ క్రమంలో పావగడ సమీపంలోని అరసికెరెకు చెందిన వీరేశ్‌తో పరిచయం ఏర్పడింది. అతడు బెంగళూరులో ఆటో నడుపుతూ జీవనం సాగించేవాడు. వీరిద్దరి మధ్య ప్రేమ చిగురించడంతో వివాహం చేసుకున్నారు. దంపతులకు ఐదేళ్ల కుమార్తె, రెండేళ్ల కుమారుడు ఉన్నారు. అయితే కొంతకాలం తర్వాత రాపిడో బైక్‌ నడిపే రాహుల్‌తో సహానకు పరిచయం ఏర్పడింది. అది క్రమంగా వివాహేతర సంబంధానికి దారితీసినట్లు సమాచారం. ఈ విషయం భర్త వీరేశ్‌కు తెలియడంతో భార్యను మందలించాడు. దీంతో దంపతుల మధ్య తరచూ గొడవలు జరుగుతున్నట్లు తెలిసింది. ఈ నేపథ్యంలో రాహుల్‌తో కలిసి మండ్యకు చేరుకున్న సహాన.. ఇండువాల్‌ సమీపంలో రైల్వే పట్టాల వద్దకు వెళ్లింది. శుక్రవారం తెల్లవారుజామున సుమారు 1.50 గంటల సమయంలో మైసూరు–బెంగళూరు ప్రయాణికుల రైలు కిందపడి ఇద్దరూ ఆత్మహత్య చేసుకున్నారు. సమాచారం అందుకున్న రైల్వే పోలీసులు ఘటనాస్థలానికి చేరుకుని మృతదేహాలను పరిశీలించారు. అనంతరం మండ్య వైద్య కళాశాల ఆసుపత్రి (మిమ్స్‌) మార్చురీకి తరలించారు. ఘటనపై కేసు నమోదు చేసిన పోలీసులు దర్యాప్తు చేస్తున్నారు. ఇద్దరు చిన్నారులు తల్లిని కోల్పోవడంతో ఈ ఘటన స్థానికంగా విషాదాన్ని నింపింది.